İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 103 Hüküm no: 43 Orijinal metin no: [12b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çelebi’nin Naime Hâtun’un hissesinden kaydedilenlerin dışında bir şey almadığının anlaşıldığı Medîne-i İznikmid’de el-Hâc Hasan mahallesi sâkinelerinden iken bundan akdem vefât [eden] Ayşe bt. Mehmed nâ[m] hâtunun li ebeveyn hâli Musa nâm kimesnenin sulbiye kızı ve zî-rahm cihetinden hasren vârisesi olan Naime nâm hâtun meclis-i şer‘-i şerîfde müteveffât-ı mezbûrenin sülüs malı kabz ve techîz ve tekfînine ve vücûh-ı hayrâta sarfa vasiyy-i muhtârı olan bâ‘is-i hâze’l-kitâb Ali Çelebi b. Mustafa nâm kimesne mahzarında üzerine da‘vâ ve takrîr-i kelâm edip merkūm Ali Çelebi müteveffâ-yı mezbûrenin ber vech-i muharrer vasiyy-i muhtârı olmağla ber mûceb-i defter-i kassâm terekesi olan kırk altı bin yedi yüz akçenin sülüsünden ziyâde defter-i kassâmdan hâric müteveffât-ı mezbûrenin terekesinden makbûzu olmağla mezbûr Ali Çelebi’ye suâl olunup defter-i kassâmdan hâric makbûzundan hisse-i irsiyyemin alıverilmesi matlûbumdur dedikde gıbbe’s-suâl ve’l-inkâr müdde‘iye-i mezbûreden müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin vasiyy-i mezbûr Ali Çelebi’ye müteveffât-ı mezbûrenin terekesinden defter-i kassâmdan hâric bir nesne kabz etmediğine yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince müdde‘iye-i mezbûre bilâ-beyyine ber vech-i muharrer mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: İsmail Beşe b. Mehmed, Hüseyin Efendi b. Hasan, el-Hâc Halil b. Ali, Ali Beşe b. Hüseyin Ağa b. ( ) ve gayruhüm mine’l-hâzırîn.