İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 103 Hüküm no: 44 Orijinal metin no: [12b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çelebi b. Mustafa’nın Ayşe bt. Mehmed’den evini ölüm döşeğindeyken düşük değerle satın aldığı Medîne-i İznikmid’de el-Hâc Hasan mahallesi sâkinlerinden iken bundan akdem vefât eden Ayşe bt. Mehmed nâm hâtunun li ebeveyn hâli Musa nâm kimesnenin sulbiye kızı ve zî-rahm cihetinden hasren vârisi Naime nâm hâtun dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîfde Ali Çelebi b. Mustafa nâm kimesne mahzarında üzerine da‘vâ ve takrîr-i kelâm edip mûrisim müteveffât-ı mezbûre maraz-ı mevtinde mülkü olup mahalle-i mezbûrda vâki‘ bir tarafdan el-Hâc İsmail mülkü ve bir tarafdan Sağır Mustafa mülkü ve bir tarafdan Aşçı Ebûbekir mülkü ve bir tarafdan tarîk-i âm ile mahdûd bir bâb fevkānî oda ve bir kiler ve sofa ve zât-ı eşcâr hadîkayı müştemil menzilini, bi cümleti’t-tevâbi‘ ve’l-levâhık ecânibden olan mezbûr Ali Çelebi’ye yüz guruş an makbûza bey‘ ve teslîm ol dahi iştirâ ve tesellüm edip lâkin menzil-i mezbûrun semen-i misli üç yüz guruş olup bey‘-i mezbûr maraz-ı mevtde muhâbâtla olmağla yedinde olan fetâvâ-yı şerîfe mûcebince mezbûr Ali Çelebi’ye suâl olunup menzil-i mezbûr ba‘de’l-keşf ve’l-mu‘âyene müteveffât-ı mezbûrenin muhâbâtından sülüs malı muhâbâtına müsâ‘id olmadığı bey‘-i mezbûre mütebeyyin oldukdan sonra müteveffât-ı mezbûrenin muhâbâtından sülüs malı müsâ‘ide olduğu mertebeyi tekmîl ve illâ bey‘-i mezbûr fesh ve menzil-i mezbûru bana devr ve teslîme merkūm Ali Çelebi’ye tenbîh olunmak matlûbumdur deyû hâlâ şeyhülislâm müfti’l-enâm hallâlü’l-müşkilâti’d-dîniyye keşşâfü’l-mu‘dilât-ı yakīniyye ferîdü’d-dehr vahîdü’l-asr sa‘âdetlü Ali Efendi hazretlerinin imzâ-i şerîfleri ile mümzât bir kıt‘a fetvâ-yı şerîf ibrâz edip mazmûnunda Hind maraz-ı mevtinde mülk menzilini ecânibden semen-i ma‘lûme muhâbâtla bey‘ ve teslîm edip ba‘dehu Hind fevt olup sülüs malı muhâbâtına müsâ‘id olmasa, verese Amr’a Hind’in muhâbâtından sülüs malı olduğunu tekmîl eyle ve illâ bey‘i fesh ederiz demeğe kādir olur mu, el-cevâb olurlar deyû buyurulmağın gıbbe’s-suâl mezbûr Ali Çelebi cevâbında menzil-i mezbûru semen-i mezbûre müteveffât-ı mezbûreden maraz-ı mevtinde iştirâ ve kabz eylediğini ikrâr, lâkin menzil-i mezbûrun semen-i misli üç yüz guruş olup bey‘-i mezbûr muhâbâtla olduğunu inkâr etmeğin menzil-i mezbûr mahallinde keşf ve mu‘âyene olunup bey‘-i mezbûr muhâbâtıyla olduğu beyân olunmak üzre, mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: İsmail Beşe b. Mehmed, Hüseyin Efendi b. Hasan, el-Hâc Ali Halil b. Ali, Ali Beşe b. Hüseyin Ağa b. ( ) ve gayruhüm.