İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 104 Hüküm no: 45 Orijinal metin no: [12b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çelebi b. Mustafa’nın Ayşe bt. Mehmed’den evini ölüm döşeğindeyken düşük değerle satın aldığı Medîne-i İznikmid’de el-Hâc Hasan mahallesi sâkinelerinden iken bundan akdem vefât eden Ayşe bt. Mehmed nâm hâtunun li ebeveyn hâli Musa nâm kimesnenin sulbiye kızı ve zî-rahm cihetinden hasren vârisesi Naime nâm hâtun dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîfde Ali Çelebi b. Mustafa nâm kimesne mahzarında üzerine da‘vâ ve takrîr-i kelâm edip mûrisem müteveffât-ı mezbûre maraz-ı mevtinden mülkü olup mahalle-i mezbûre[de] vâki‘ bir tarafdan el-Hâc İsmail mülkü ve bir tarafdan Sağır Mustafa mülkü ve bir tarafdan Aşçı Ebûbekir mülkü ve bir tarafdan tarîk-i âm ile mahdûd bir bâb fevkānî oda ve bir kiler ve bir sofa ve zât-ı eşcâr hadîkayı müştemil menzilini, bi cümleti’t-tevâbi‘ ve’l-levâhık ecânibden olan mezbûr Ali Çelebi’ye yüz guruş an makbûza bey‘ [13a] ve teslîm ol dahi iştirâ ve tesellüm edip lâkin menzil-i mezbûrun semen-i misli üç yüz guruş olup bey‘-i mezbûr maraz-ı mevtde muhâbâtla olmağla yedimde olan fetvâ-yı şerîfe mûcebince mezbûr Ali Çelebi’ye suâl olunup menzil-i mezbûr ba‘de’l-keşf ve’l-mu‘âyene müteveffât-ı mezbûrenin sülüs malı muhâbâtına müsâ‘id olmadığı bey‘-i mezbûr müte‘ayyin oldukdan sonra müteveffât-ı mezbûrenin muhâbâtından sülüs malı müsâ‘id olduğu mertebeyi tekmîl ve illâ bey‘-i mezbûru fesh ve menzil-i mezbûru bana red ve teslîme mezbûr Ali Çelebi’ye tenbîh olunmak matlûbumdur deyû hâlâ şeyhü’l-islâm müfti’l-enâm hallâlü’l-müşkilâtü’d-dîniyye keşşâfü’l-mu‘dilâti’l-yakīniyye ferîdü’d-dehr vahîdü’l-asr sa‘âdetlü Ali Efendi hazretlerinin imzâ-i şerîfleri ile mümzât bir kıt‘a fetvâ-yı şerîfe ibrâz edip mazmûnunda Hind maraz-ı mevtinde mülk menzilini ecânibden Amr’a semen-i ma‘lûme muhâbâtla bey‘ ve teslîm edip ba‘dehu Hind fevt olup sülüs malı muhâbâtına müsâ‘id olmasa, verese Amr’a Hind’in muhâbâtından sülüs müsâ‘id olmadığı mertebeyi tekmîl eyle ve illâ bey‘i fesh ederiz demeğe kādir olur mu, el-cevâb olur deyû buyurulmağın gıbbe’s-suâl mezbûr Ali Çelebi cevâbında menzil-i mezbûru semen-i mezbûre müteveffât-ı mezbûreden maraz-ı mevtinde iştirâ ve kabz eylediğini ikrâr, lâkin menzil-i mezbûrun semen-i misli üç yüz guruş olup bey‘-i mezbûr muhâbâtla olduğunu inkâr etmeğin menzil-i mezbûr mahallinde teftîş ve mu‘âyene olunup bey‘-i mezbûr muhâbâtla olduğu beyân olunmak üzre, mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: İsmail Beşe b. Mehmed, Hüseyin Efendi b. Hasan, el-Hâc Halil b. Ali, Ali Beşe b. ( ), Hüseyin Ağa b. ( ) ve gayruhüm.