İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 109 Hüküm no: 51 Orijinal metin no: [14a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Beşe b. Seyfullah’ın kölesi Şâhin’i mükâtebe yoluyla azat ettiği Mahmiye-i İstanbul’da Seferikoz mahallesi sükkânından Mustafa Beşe b. Seyfullah nâm kimesne meclis-i şer‘-i şerîfde kendiye rıkkıyyetini mu‘terife olan işbu orta boylu açık kaşlı sarı ala gözlü Maltiyyü’l-asl sâhib-i hâze’l-kitâb Şâhin b. Abdülvahhab muvâcehesinde ikrâr ve takrîr-i kelâm edip mezbûr Şâhin târih-i kitâbdan bir sene tamâmına değin her gün bana yirmişer akçe vermek üzre mezbûr Şâhin’i kitâbete kat‘ edip mezbûr Şâhin dahi kitâbet-i mezbûru dahi kabûl eyledi. Mezbûr Şâhin bedel-i kitâbet-i mezbûreyi ber vech-i muharrer bana edâ edip sene-i mezbûre tamâm oldukda, mezbûr Şâhin sâir ahrâr-ı asliyyîn gibi hür olsun dedikde mezbûr Şâhin mukırr-ı merkūm Mustafa Beşe’yi ikrâr-ı meşrûhunda tasdîk ve tahkīk etmeğin mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Mehmed Beşe b. Timur, Receb Beşe b. Mustafa, Ahmed Beşe b. Ali, Mustafa b. Haydar, İbrahim b. Mehmed ve gayruhüm.