İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 114 Hüküm no: 59 Orijinal metin no: [15b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim b. Mehmed’in mirası hisseleri için Bayram Efendi’nin vekil olduğuna şahitlik edildiği Mahmiye-i İstanbul’da Keçeci Pîrî mahallesinde sâkin iken bundan akdem vefât eden İbrahim b. Mehmed nâm kimesnenin verâseti, zevce-i metrûkesi Belkıs bt. Abdullah ve sulbiye kızı Ayşe ve li ebeveyn kız karındaşı Emine nâm hâtun münhasıra olup ba‘dehu mezbûre Ayşe dahi vefât edip verâseti vâlidesi mezbûre Belkıs’a ve li üm kız karındaşı diğer Ayşe ve li ebeveyn ammi oğulları Mehmed ve Osman ve diğer Mehmed ve Ahmed benân-ı Mustafa nâm kimesneler olup mezbûre diğer Ayşe dahi vefât edip verâseti, vâlidesi mezbûre Belkıs’a münhasıra olduğu şer‘an zâhir ve müte‘ayyin oldukdan sonra mezbûre Emine Hâtun’un oğlu ve tarafından husûs-ı âti’l-beyâna ber vech-i âtî vekâlet iddi‘â edip fahrü’l-kuzât bâ‘is-i hâze’l-kitâb Bayram Efendi b. eş-Şeyh Receb nâm kimesne meclis-i şer‘-i şerîfde müteveffâ-yı evvel mezbûr İbrahim terekesinden olup mahalle-i mezbûrede vâki‘ beyne’l-ahâlî ve’l-cîrân ma‘lûmü’l-hudûd büyût-ı adîdeyi müştemil menzile vâzı‘atü’l-yed olduğu müte‘ayyin olan mezbûre Belkıs mahzarında üzerine da‘vâ ve takrîr-i kelâm edip müteveffâ-yı mezbûre İbrahim’in terekesinden olan menzil-i mezbûrdan müvekkile-i mezbûre Emine bi’l-irsi’ş-şer‘î kendiye isâbet ve intikāl eden hisse-i şer‘iyyesini taleb ve da‘vâ ve ahz u kabz ve bey‘ ve kabz-ı semene ve lâzım gelirse sulh ve ibrâya tarafından beni vekîl edip ben dahi vekâlet-i mezbûreyi kabûl etmekle hâlâ mezbûr Belkıs’a suâl olunup menzil-i mezbûreden müvekkilem mezbûrenin hisse-i şer‘iyyesi olan kırk sekiz semenden on sekiz semeni bana teslîm olunmak matlûbumdur dedikde gıbbe’s-suâl Belkıs cevâbında müteveffâ-yı mezbûr İbrahim’in terekesinden olan menzil-i mezbûra vâzı‘atü’l-yed olduğunu ikrâr, lâkin mezbûr Bayram Efendi’nin ber vech-i muharrer mezbûr[e] Emine tarafından vekîl olduğunu inkâr etmeğin müdde‘î-i mezbûr Bayram Efendi’den ber vech-i muharrer vekâletine beyyine taleb olundukda udûl-i müslimînden olup mahalle-i mezbûre sâkinlerinden İmâm el-Hâc Ahmed Efendi b. Ramazan ve Mahmud Beşe b. Mehmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr[e] Emine müteveffâ-yı mezbûr İbrahim’in terekesinden olan menzil-i mezbûrdan bi’l-irsi’ş-şer‘î kendiye intikāl eden hisse-i şer‘iyyesini taleb ve da‘vâ ve ahz u kabza ve bey‘ ve kabz-ı semene ve lâzım gelirse sulh ve ibrâya mezbûr Bayram Efendi’yi bizim huzûrumuzda vekîl ve nâib-i menâb nasb ve ta‘yîn etmiş idi biz bu husûsa bu vech üzre şâhidleriz, şehâdet dahi ederiz deyû her biriedâ-i şehâdet-i şer‘iyye ettiklerinde gıbbe ri‘âyeti şerâit-i kabûl şehâdetleri makbûle olmağın mûcebince müdde‘î-i mezbûrun ber vech-i muharrer vekâletine ba‘de’l-hükmi’ş-şer‘î menzil-i mezbûrdan müvekkile-i mezbûrenin hissesi olan kırk sekiz sehimden on sekiz sehmi müdde‘î-i mezbûre teslîme mezbûre Belkıs’a tenbîh olunmağın mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: İbrahim Çelebi b. Ahmed, Osman Çelebi b. Ömer, Ebûbekir b. Hüseyin, Veli Bey b. Mahmud, Muharrem b. Şaban, İbrahim b. Mustafa ve gayruhüm mine’l-hâzırîn.