İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 117 Hüküm no: 61 Orijinal metin no: [16a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Durmuş’un mehrini zevci Ahmed Beşe’ye hibe ettiği Mahmiye-i İstanbul’da Ördek Kasab mahallesi sâkinelerinden Emine bt. Durmuş nâm hâtun tarafından husûs-ı âti’l-beyâna vekîl olduğu mezbûre Emine Hâtun’un zâtını ma‘rifet-i şer‘iyye ile ârifân mahalle-i mezbûre sükkânından Mahmud Efendi b. Hasan ve el-Hâc Ahmed b. Ali nâm kimesneler şehâdetleri ile şer‘an sâbit olan Müezzin İbrahim Efendi b. Süleyman nâm kimesne meclis-i şer‘-i şerîf-i lâzımü’t-teşrîfde, mezbûre Emine Hâtun’un zevci Ahmed Beşe b. Habib nâm kimesne mahzarında bi’l-vekâle ikrâr ve takrîr-i kelâm edip hibe-i âtiyyetü’z-zikrin sudûruna değin müvekkile-i mezbûre Emine Hâtun[’un] mezbûr Ahmed Beşe zimmetinde mütekarrir ve ma‘kūdun-aleyh olan dört bin akçe mehr-i müeccelini mezbûr Ahmed Beşe’ye hibe-i sahîha-i şer‘iyye ile hibe ve temlîk, ol dahi meclis-i hibede ittihâb ve temellük ve kabûl eyledi dedikde gıbbe’t-tasdîki’ş-şer‘î ve’t-tahkīki’l-mer‘î mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Eş-Şeyh Mehmed Efendi b. Resûl, Kenan b. Abdullah, el-Hâc Sinan b. Mehmed, Osman b. Abdullah, Veli Bey b. Mahmud, Mustafa Çelebi b. Ahmed, Abdullah Çelebi b. Mehmed.