İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 117 Hüküm no: 62 Orijinal metin no: [16a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Receb Çavuş’un Fütûha Hâtun Vakfı’na olan borcunu ödemesi ve rehin olan mallarını geri alması Medîne-i Ebâ Eyyûb-i Ensârî merhûme Fütûha Hâtun vakfına bi’l-fi‘l mütevellî olan sâhib-i hâze’l-kitâb Mehmed Çavuş b. Abdullah nâm kimesne dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîfde medîne-i mezbûre Kiremitçi Süleyman mahallesi sükkânından Receb Çavuş b. Abdullah nâm kimesne mahzarında üzerine da‘vâ ve takrîr-i kelâm edip yedimde olan mâl-ı vakf-ı mezbûrdan otuz esedî guruşu mezbûr Receb Çavuş[’a] bin seksen altı senesinde idâne ve teslîm ol dahi istidâne ve kabz ettiğinden sonra mukābelesinde mecmû‘u yüz seksen sekiz dirhem bir sîm gülabdân ve bir sîm buhurdân ve bir sîm nahılını bana rehin vaz‘ ve teslîm ben dahi ahz u kabz etmiş idim hâlâ mezbûr Receb Çavuş’a suâl olunup meblağ-ı mezbûru bana edâya ve rihân-ı mezbûreyi yedimden kabza tenbîh olunmak matlûbumdur dedikde gıbbe’s-suâl mezbûr Receb Çavuş cevâbında kaziyye minvâl-i muharrer üzre olduğunu bi tav‘ihî ikrâr ve i‘tirâf etmeğin mûcebince meblağ-ı mezbûr otuz guruşu müdde‘î-i mezbûr Mehmed Çavuş’a edâ ve teslîme ve rihân-ı mezbûreyi kabza mezbûr Receb Çavuş’a tenbîh olunmağın mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Mefharü erbâbü’t-tahrîr ve’l-kalem Hasan Efendi tezkire-i ûlâ, Kıdvetü ashâbü’t-tastîr ve’r-rakam Yusuf Efendi tezkire-i sâniye, Fahrü’l-akrân ve’l-emâsil hâlâ çavuşbaşı Murad Ağa, Zahrü’l-emâcid ve’l-a‘yân hâlâ Muhzır Kasım Ağa ve gayruhüm mine’l-hâzırîn.