İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 118 Hüküm no: 63 Orijinal metin no: [16b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil Çelebi’nin Ali Efendi’ye olan borcunu ödediği ve evin rehninin kaldırıldığı Mahmiye-i İstanbul’da Mahmud Paşa kurbunda Serv[i] mahallesi sâkinlerinden umdetü ashâbü’t-tastîr ve’r-rakam zübdetü erbâbü’t-tahrîr ve’l-kalem Ali Efendi b. Mürsel meclis-i şer‘-i şerîf-i enverde bâ‘is-i hâze’l-kitâb Halil Çelebi b. ( ) nâm kimesne mahzarında ikrâr ve takrîr-i kelâm edip bin seksen altı Receb’i gurresinde mezbûr Halil Çelebi yedimden beş yüz esedî guruş iktirâz ve kabz etmekle meblağ-ı mezbûr zimmetinde bana deyn[i] olmağın mezbûr Halil Çelebi’nin hâlası? olan gâ’ibe ani’l-meclis Belkıs bt. Süleyman nâm hâtun mahmiye-i mezbûrede Demirtaş mahallesinde vâki‘ merhûme Hatice Hâtun ve Harameyn-i şerîfeyn ve Samanveren vakıflarından olan biri birine muttasıl üç kıt‘a arsa üzerine mu‘accele ile mahsûb olmak üzre binâ ettiği hâriciyyesinde fevkānî iki bâb oda ve iki sofa ve tahtında dört dükkân ve dâhiliyyesinde fevkānî iki bâb oda ve iki sofa ve tahtânî iki mutfak ve bir kiler ve bir su kuyusu ve zât-ı eşcâr hadîkayı müştemil menzilini, meblağ-ı mezbûr mukābelesinde rehin mesâbesinde olmak üzre evkāf-ı mezbûre mütevellîleri izinleri ile bi tarîki’l-hıyâr bana ferâğ ve tefvîz ben dahi ber vech-i muharrer tefevvüz ve kabûl etmiş idim hâlâ mezbûr Halil Çelebi meblağ-ı mezbûr beş yüz guruşu bana edâ ve teslîm ben dahi yedinden tamâmen ahz u kabz eylediğimden sonra fesh-i akd edip menzil-i mezbûru mezbûr Belkıs’a teslîm ol dahi kabz ve tesellüm eyledi min ba‘d meblağ-ı mezbûr beş yüz yüz guruşdan mezbûr Halil Çelebi zimmetinde bir akçe ve bir habbe kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’s-sâmin ve’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Ali Efendi b. Mustafa, Çorbacızâde Ahmed Ağa, Ömer Ağa b. Şaban, Mehmed Çavuş b. Süleyman, Ali Efendi b. Mehmed, Kethüdâ b. Ahmed Ağa, Ebûbekir Çavuş b. Hızır, Ömer Çavuş b. Abdullah, Ali Çelebi b. Yahya, Abdurrahman Efendi, Hüseyin Çelebi b. Üveys, el-Hâc Kemaleddin Ağa ve gayruhüm mine’l-hâzırîn.