İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 119 Hüküm no: 64 Orijinal metin no: [16b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Ağa Vakfı eski mütevellisi olup vefat eden Ahmed b. Abdullah’ın vakfa ait borcunun terekesinden karşılanması Mahmiye-i İstanbul’da merhûm Enik Ahmed Ağa vakfına bi’l-fi‘l mütevellî olan Hüseyin Çelebi b. İbrahim nâm kimesne meclis-i şer‘-i şerîfde vakf-ı mezbûre sâbıkan mütevellî olup mahmiye-i mezbûrede Nahılbend mahallesinde sâkin iken vefât eden el-Hâc Ahmed b. Abdullah nâm kimesnenin zevcesi olan bâ‘isetü hâze’l-kitâb Hatice bt. Abdullah nâm hâtun mahzarında üzerine da‘vâ ve takrîr-i kelâm edip müteveffâ-yı mezbûr Ahmed zamân-ı tevliyyetinde yedinde mâl-ı vakf-ı mezbûrdan iki bin dört yüz guruşu kendi mesârifine sarf ile istihlâk edip zimmetinde vakf-ı mezbûre deyni olduğundan sonra kable’l-edâ fevt olmağla mezbûre Hatice Hâtun müteveffâ-yı mezbûr terekesinden mecmû‘ otuz guruş kıymetli bir neftî çuka bir kaplı samur paçası kürk ve bir maî çukaya kaplı beden kürkü ve bir mor çuka harmana ferâce ve bir maî kuşak kapama ve bir sof tuman çakşır ve bir çuka diz çakşır ve iki mahramene tülbent ve mahramene kavuk ve bir mahramene tülbent kürkü ve iki mahramene zıbını bey‘ ve semenlerinden meblağ-ı mezbûr otuz guruşu vakf-ı mezbûr için istîfâ etmek üzre bana teslîm ben dahi ahz u kabz edip iki bin üç yüz guruşu bâkī kalmışdı hâlâ mezbûre Hatice Hâtun’a suâl olunup müteveffâ-yı mezbûrun terekesine vâzı‘ü’l-yed olmağla meblağ-ı bâkī-i mezbûru müteveffâ-yı mezbûrun terekesinden bana edâ ve teslîme tenbîh olunmak matlûbumdur dedikde gıbbe’s-suâl mezbûre Hatice Hâtun cevâbında meblağ-ı bâkī mezbûr müteveffâ zimmetinde vakf-ı mezbûre deyni olduğu[nu] ikrâr, lâkin müteveffâ-yı mezbûrun terekesinden müdde‘î-i mezbûrun kabzını i‘tirâf ettiği eşyâ-i mezkûrdan gayrı bir nesne kabz etmedim deyû inkâr etmekle müdde‘î-i mezbûrdan müdde‘âsını mübeyyine beyyine taleb olundukda beyyinem yoktur deyû ityân-ı beyyineden izhâr-ı aczile istihlâf etmeğin mezbûr Hatice Hâtun müteveffâ-yı mezbûrun terekesinden müdde‘î-i mezbûr kabzını i‘tirâf ettiği eşyâ-i mezkûrdan gayrı bir nesne kabz etmediğine yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince müdde‘î-i mezbûr bilâ-beyyine zevce mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’l-âşir mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Es-Seyyid Ahmed Çelebi b. Nasreddin, es-Seyyid Emrullah Efendi b. Hüseyin, Elfîrâh Mustafa Çelebi b. Mehmed, el-Hâc Ahmed b. Şaban, Mehmed Çelebi b. Süleyman, Mehmed b. Abdullah, Sarrâc Ali, Zülfikār b. Abdullah, Mahmud b. Mahmud, Mehmed b. Ahmed, el-Hâc Ali b. Abdullah, Ahmed Ağa b. Ali el-Mübâşir, Hüseyin Beşe b. Ebûbekir el-Mübâşir ve gayruhüm mine’l-hâzırîn.