İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 120 Hüküm no: 65 Orijinal metin no: [16b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. İbrahim’in annesi ve kardeşlerine düşen mirasının vasîleri bulunan Bayram Efendi’den alındığı Mahmiye-i İstanbul’da Keçeci Pîrî mahallesinde sâkine iken bundan akdem vefât eden Ayşe bt. İbrahim nâm sagīrenin verâseti vâlidesi Belkıs bt. Abdullah nâm hâtun ile li üm karındaşı diğer Ayşe’ye ve li ebeveyn ammi oğulları Mehmed ve Osman ve diğer Mehmed ve Ahmed ibney Mustafa nâm kimesneler olup ba‘dehu mezbûre diğer Ayşe dahi vefât edip verâseti, vâlidesi mezbûre Belkıs’a münhasıra olduğu şer‘an zâhir ve müte‘ayyin oldukdan sonra mezbûr Mehmed kendi tarafından asâleten ve karındaşları mezbûrûn Osman ve diğer Mehmed ve Ahmed tarafından husûs-ı âti’l-beyâna ber vech-i âtî vekâlet iddi‘â etmekle vekâleten meclis-i şer‘-i şerîfde sagīre-i mezbûrenin hâl-i hayâtında tesviye-i umûruna kıbel-i şer‘den mansûb vasîsi olmağla terekesine vâzı‘ü’l-yed olan fahrü’l-kuzât bâ‘is-i hâze’l-kitâb Bayram Efendi b. Receb nâm kimesne mahzarında üzerinde da‘vâ ve takrîr-i kelâm edip müteveffâ-yı mezbûr Ayşe’nin terekesinden ber mûceb-i defter-i kassâm vasiyy-i merkūm [17a] Bayram Efendi makbûz olan dokuz bin yüz seksen akçe ve merkūm Bayram Efendi sagīre-i mezbûrenin hayâtında nafakasına ve fevt ve techîz ve tekfîne olan iki bin yüz elli akçeden bâkī yedinde olan yedi bin otuz akçeden karındaşlarım mezbûrlardan Osman ve diğer Mehmed ve Ahmed hisse-i şer‘iyyelerini mezbûr Bayram Efendi’den taleb ve da‘vâ ve ahz u kabza ve kendilere îsâle ve ahz u kabz ve îsâl mütevakkıf olduğu umûrun küllîsine taraflarından beni vekîl edip ben dahi vekâlet-i mezbûreyi kabûl etmekle hâlâ mezbûr Bayram Efendi cevâbında müteveffât-ı mezbûrenin terekesinden ber mûceb-i defter-i kassâm meblağ-ı bâkī-i mezbûr makbûzu olduğunu ikrâr, lâkin müdde‘î-i mezbûr Mehmed’in karındaşı mezbûrûn Osman ve diğer Mehmed ve Ahmed taraflarından ber vech-i muharrer vekîl olduğunu inkâ[r] etmeğin müdde‘î-i mezbûrdan ber vech-i muharrer vekâletine beyyine taleb olundukda mahmiye-i mezbûrede Hoca Pîrî mahallesinde Receb b. Mehmed ve Şeyh Ebülvefâ mahallesinden Ömer b. Osman nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûrûn Osman ve diğer Mehmed ve Ahmed tereke-i müteveffât-ı mezbûreden kendilere isâbet eden [hisse-i] şer‘iyyelerini tereke-i müteveffât-ı mezbûreye vâzı‘ü’l-yed olan vasiyy-i mezbûr Bayram Efendi’den taleb ve da‘vâ ve ahz u kabza ve kendilere îsâle ve ahz u kabz ve îsâl mütevakkıf olduğu umûrun küllîsine taraflarından müdde‘î-i mezbûr Mehmed[’i] bizim huzûrumuzda vekîl ve nâib-i menâb nasb ve ta‘yîn edip ol dahi vekâlet-i mezbûreyi kabûl etmiş idi biz bu husûsa bu vech üzre şâhidleriz, şehâdet dahi ederiz deyû her biriedâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince müdde‘î-i mezbûrun ber vech-i muharrer vekâletine ba‘de’l-hükmi’ş-şer‘î müdde‘î-i mezbûr ile müvekkil-i merkūmûnun hisseleri olan meblağ-ı mezbûr üç bin beş yüz guruş akçeyi müdde‘î-i mezbûre edâ ve teslîme mezbûr Bayram Efendi’ye tenbîh olundukdan sonra müdde‘î-i mezbûr Mehmed meclis-i şer‘de merkūm Bayram Efendi mahzarında ikrâr ve takrîr-i kelâm edip ânifen teslîme tenbîh olunan meblağ-ı mezbûr üç bin beş yüz on beş akçeyi merkūm Bayram Efendi bana def‘ ve teslîm ben dahi bi’l-iltimâs asâleten ve vekâleten ahz u kabz eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Es-Seyyid Muharrem Çelebi b. es-Seyyid İsmail, Şeyh Mehmed Efendi kâtib, Musa Efendi b. ( ), Ahmed Çelebi b. el-Hâc Ferhad, Ahmed Efendi şeyh-i Ebülvefâ, Ahmed Efendi b. Mehmed el-Müezzin, İbrahim Çelebi b. Mehmed, Veli Bey b. Mahmud.