.:: İstanbul Kadı Sicilleri ::.


Ahi Çelebi Mahkemesi 1 Numaralı Sicil (H. 1063-1064 / M. 1652-1653)
cilt: 49, sayfa: 100
Hüküm no: 92
Orijinal metin no: [14a-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Es-Seyyid Süleyman Efendi’nin bazı ev eşyasını hanımına hibe ettiği

Mahmiye-i Kostantıniyye mahallâtından Pirinççi Sinan Mahallesi’nde sâkin olan mefharü’s-sâdâti’l-kirâm es-Seyyid Süleyman Efendi b. Mustafa meclis-i şer‘-i hatîr-i lâzımü’t-tevkīrde zevcesi işbu sâhibetü’l-kitâb Kâtibe bt. Abdullah nâm hatun mahzarında ikrâr-ı tâm ve tâ‘bir ani’l-merâm edip silk-i mülkümde muntazam olan eşyâdan bir mushaf-ı şerîf ve iki beneki orta keçesi ve üç Selanik yan keçesi ve dört beyâz tiftik kebe ve on bir tepe yasdığı ma‘a gılâf ve altı aded münakkaş yasdık ve yedi minder ve on aded yemenî yorgan çarşaflarıyla ve on bir kilim ve üç mâî velence ve üç kırmızı velence ve bir beyâz velence ve üç seped sandığı ve bir ayaklı sandık ve üç seccâde ve yedi Yanbolu kebesi ve dört güğüm ve yedi tencere ve on beş aded sahan ve beş leğen ve beş ibrik ve bir kazgan ve sekiz aded hurda tepsi ve üç tabe ve dört aded baklava tepsisi ve dört aded hamam tası ve zikr olunan emti‘adan mâ‘adâ menzilimde olan sâir evânî-i nuhâsiyeyi cümle-i emvâlimden ihrâc ve ifrâz ve zevcem sâlifetü’z-zikr Kâtibe Hatun’a hibe-i sahîha-i şer‘iyye ile [14b] hibe ve teslîm edip mezbûre Kâtibe dahi zikri mürûr eden eşyâyı ve sâir beynimizde ma‘lûm olan nuhâsiyyât-ı mevhûbeyi ittihâb ve kabûl ve meclis-i hibede cümlesini kabz ve tesellüm eyledi, ba‘de’l-yevm eşyâ-yı mârrü’l-beyân merkūme Kâtibe Hatun’un emlâk-i mevhûbesi ve hakk-ı sarîhidir, keyfe mâ türîd ve tehtâr mutasarrıfe olsun dedikde müşârun-ileyh es-Seyyid Süleyman Efendi’den sâdıra olan kelimât-ı muharrereyi mezbûre Kâtibe Hatun bi’l-muvâcehe tasdîk ve bi’l-müşâfehe tahkīk ettikden sonra mâ-hüve’l-vâki‘ ba‘de’t-taleb ketb olundu.

Tahrîren fi’l-Muharremi’l-harâm sene selâse ve sittin ve elf.

Şuhûdü’s-sâbık.