İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 121 Hüküm no: 66 Orijinal metin no: [17a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdullah Efendi’nin Bezzâz-ı Cedid mahallesindeki arsa alımı için para verdiği eski damadı Abdülvehhâb’dan arazileri talep etmesi Mahmiye-i İstanbul’da Bezzâz-ı Cedîd mahallesinde sâkin bâ‘is-i hâze’l-kitâb Abdullah Efendi b. İbrahim nâm kimesne meclis-i şer‘-i şerîfde sâbıkan dâmâdı olan Abdülvahhab Çelebi b. Hızır nâm kimesne üzerine da‘vâ ve takrîr-i kelâm [edip] târih-i kitâbdan dört sene mukaddem fahrü’l-akrân Hasan Ağa b. Ahmed nâm kimesnenin silk-i mülkünde münselik olup mahalle-i mezbûrede vâki‘ bir tarafdan Güliser Hâtun vakfı ve bir tarafdan ba‘zan Ayşe Hâtun mülkü ve ba‘zan Hacı Ramazan veresesi mülkleri ve ba‘zan Abdurrahman Çelebi mülkü ve bir tarafından tarîk-i âm ile mahdûd olup bir su kuyusunu müştemil arsayı ve yine mezbûr Hasan Ağa’nın icâreteyn-i ma‘lûmeteyn ile taht-ı tasarrufunda olup hudûd-ı mezbûre dâhilinde vâki‘ tûlen ve arzen bi hesâb-ı terbî‘î yüz altmış zirâ‘ olup bir su kuyusunu hâvî vakıf arsayı mezbûr Hasan Ağa’dan benim için iştirâ ve tesellüm ve tefevvüz ve kabûl eyledi deyû dört yüz elli altı guruşumu mezbûr Abdülvahhab Çelebi’ye def‘ ve teslîm ol dahi ahz u kabz ettiğinden sonra mezbûr Hasan Ağa’nın vekîli olan Receb Çelebi’den benim için bi’l-vekâle zikr olunan mülk arsayı ve üç yüz guruşa iştirâ ve tesellüm ve vakf arsayı yüz elli altı guruş bedel mukābelesinde izn-i mütevellî ile tefevvüz ve kabûl etmekle mârrü’z-zikr mülk arsa benim mülküm ve vakıf arsa hakk-ı makbûzum olmağla mezbûr Abdülvahhab Çelebi’ye suâl olunup zikr olunan arsaları bana def‘ ve teslîme tenbîh olunmak matlûbumdur dedikde gıbbe’s-suâl mezbûr Abdülvahhab Çelebi cevâbında kaziyye minvâl-i muharrer üzre olup meblağ-ı mezbûr dört yüz elli [altı] guruşu mezbûr Abdullah Efendi yedinden ahz u kabz ettiğinden sonra müdde‘î-i mezbûr için bi’l-vekâle zikr olunan arsaları iştirâ ve tesellüm ve tefevvüz ve kabûl edip mârrü’z-zikr mülk arsa müdde‘î-i mezbûrun mülkü ve vakıf arsa hakk-ı müfevvezi olduğunu ikrâr ve i‘tirâf etmeğin mûcebince zikr olunan arsaları müdde‘î-i mezbûre teslîme mezbûr Abdülvahhab Çelebi’ye tenbîh olunup mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Mesnevî Mehmed Bey, dellâk İbrahim Beşe, Nalıncı Ahmed Efendi, Mustafa Çavuş, Hacı Hasan.