İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 123 Hüküm no: 68 Orijinal metin no: [17b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Markos v. Kostosdur’un odabaşıya olan borcunu ödediği Mahmiye-i İstanbul hısnı ebvâbından Balatkapısı dâhilinde el-Hâc İsâ mahallesinde sâkin bâ‘is-i hâze’s-sifr Markos v. Kostosdur nâm zimmî meclis-i şer‘-i şerîfde Anton v. Mardiros nâm zimmî mahzarında takrîr-i kelâm ve ta‘bîr ani’l-merâm edip gâ’ib ani’l-meclis ( ) nâm odabaşıya zimmetimde kırk beş esedî guruş deynim olmağla dâyinim olan gâ’ib-i mezbûre Anton’a def‘ ve teslîm ol dahi yedimden ahz u kabz etmiş idi hâlâ suâl olunup tahrîr olunmak matlûbumdur dedikde gıbbe’s-suâl mezbûr Anton cevâbında fi’l-hakīka mezbûr Markos yedinden ber vech-i muharrer kırk beş esedî guruşu ahz u kabz eylediğimden sonra meblağ-ı mezbûru bundan akdem dâyini olan merkūm ( ) odabaşıya tamâmen def‘ ve teslîm ol dahi yedimden ahz u kabz eyledi deyû ikrâr ve i‘tirâf etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Osman Çelebi b. Mustafa, Mehmed b. Abdullah, Abdullah b. Ahmed, İbrahim b. Ahmed el-Muhzır, Yagob v. Bandel, Misis v. Menen?, Bağdasar v. ( ).