İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 127 Hüküm no: 74 Orijinal metin no: [18b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aynı dükkânı kullanan İstemad v. Nikola’nın kendisinden izinsiz Kiro v. Kogo’nun bir miktar parasını aldığını itiraf ettiği Mahmiye-i İstanbul’da Yeni Odalar kurbunda Sofular mahallesinde vâki‘ çörekçi dükkânında hâlâ müste’cir olan bâ‘is-i hâze’s-sifr Kiro v. Kogo nâm zimmî meclis-i şer‘-i şerîfde İstemad v. Nikola nâm zimmî mahzarında takrîr-i kelâm ve ta‘bîr-i ani’l-merâm edip mezbûr İstemad bundan akdem dükkân-ı mezbûrda benim ile ma‘an sâkin iken iznimsiz zenbilim içinden elli beş esedî guruşumu ahz u kabz ve kendi mesârifine sarfla istihlâk etmekle meblağ-ı mezbûr zimmetinde bana vâcibü’l-edâ deyni olmağın hâlâ mezbûr İstemad’a suâl olunup takrîri tahrîr olunmak matlûbumdur dedikde gıbbe’s-suâl mezbûr İstemad cevâbında fi’l-hakīka kaziyye bâlâda tafsîli mürûr ettiği vech üzre olup mezbûr Kiro’ya vech-i muharrer üzre elli beş esedî guruşunu ahz edip zimmetinde vâcibü’l-edâ deyni olduğunu tâyi‘an ikrâr ve i‘tirâf etmeğin mâ hüve’l-vâki‘ bi’t-taleb ketb olundu. Fi’l-yevmi’s-sânî min Saferi’l-hayr li sene seb‘a ve semânîn ve elf.