İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 127 Hüküm no: 75 Orijinal metin no: [18b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Hasan’ın eşi Muharrem b. Mahmud’dan muhâla‘a yoluyla boşandığı Mahmiye-i İstanbul’da Derviş Ali mahallesi sâkinelerinden Ayşe bt. Hasan nâm hâtun zâtı ma‘rifet-i şer‘iyye ile ârifân müezzin Ömer Halîfe b. Ahmed ve Yusuf b. Abdullah nâm kimesneler ta‘rîfleri ile mu‘arrefe oldukdan sonra meclis-i şer‘-i şerîfde zevc-i dâhili bâ‘is-i hâze’l-kitâb Muharrem b. Mahmud nâm kimesne mahzarında ikrâr ve takrîr-i kelâm edip zevcim mezbûr Muharrem zimmetinde mütekarrir ve ma‘kūdun-aleyh olan iki bin akçe mehr-i müeccelime ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzre zevcim mezbûr Mehmed ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl ettikden sonra hukūk-ı zevciyyete müte‘allika âmme-i da‘vâdan her birimiz âharın zimmetini ibrâ’-i âmm-ı kātı‘ü’n-nizâ‘ ile ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî mine’s-Saferi’l-hayr li sene seb‘a ve semânîn ve elf. Şuhûdü’l-hâl: Berber Mustafa Çelebi b. ( ), İvaz Beşe b. ( ), Mehmed Çelebi Kethüdâ-yı muhzırân, İbrahim Çelebi b. Ahmed, Durmuş b. Pîrî.