İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 131 Hüküm no: 80 Orijinal metin no: [20a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiriç v. Kirkor’un bakkal dükkânında el konulan eşyasının iadesi Vilâyet-i Rum karyeden olup Mahmiye-i İstanbul’da Kovacı Dede[’de] vâki‘ dükkânda bakkal olan Kiriç v. Kirkor nâm zimmî meclis-i şer‘-i hatîr-i lâzım-ı tevkīrde sâhib-i hâze’l-kitâb Abdullah Efendi b. İbrahim nâm kimesne mahzarında ikrâr ve takrîr-i kelâm edip bundan akdem ben karye-i mezbûreye gittiğimde dükkân-ı mezkûr mu‘attal olmağın dîvân-ı şer‘den feth olunup içinde olan iki güğüm ve bir kazanım bi tarîki’l-emâne taraf-ı şer‘den mezbûr Abdullah Efendi’ye teslîm ol dahi ahz u kabz edip hâlâ biz gelmekle mezbûr Abdullah Efendi zikr olunan iki güğüm ve bir kazanı bana teslîm ben dahi ahz u kabz eyledim dedikde gıbbe’t-tasdîki’ş-şer‘î işbu hâzırân bi’l-meclis Farman Yodoroki v. Ayor [ve] Diyaz v. Nikola ve Trandafilo v. Yorgi [ve] Dimitri v. Yorgo nâm zimmîlerden her biri mezbûr Kiriç’in nefsine ve hîn-i mütâlebede meclis-i şer‘a ihzârına tarafından emir ve kabûlü hâviye kefâlet ile kefîl olmağın mâ hüve mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: El-Hâc Mustafa b. Ali, Nalçacı Ali b. ( ), attâr Hacı Hasan b. ( ), attâr Mehmed Çelebi b. ( ), İbrahim Çelebi b. Mehmed, Ebûbekir b. Hasan, Veli Beşe b. ( ) ve gayruhüm mine’l-hâzırîn.