İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 137 Hüküm no: 87 Orijinal metin no: [21b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasımpaşa’da vefat eden Mehmed Çelebi b. Şaban’ın evinin borçlu olduğu Ahmed Çelebi b. Bâli’nin vârislerine kaldığı Mahrûse-i Galata müzâfâtından kasaba-i Kasımpaşa’da Kulaksız Ahmed Çelebi mahallesi sâkinlerinden iken bundan akdem vefât eden Mehmed Çelebi b. Şaban nâm kimesnenin vâlidesi ve hasren veresesi olan Hatice bt. Mehmed nâm hâtun meclis-i şer‘-i şerîfde mahalle-i mezbûre sâkinlerinden iken bundan akdem vefât eden Ahmed Çelebi b. Bâli nâm kimesnenin verâseti zevce-i metrûke[si] diğer Hatice ve sulbiye kebîre kızı Sâliha nâm hâtunlara ve sulbiye sagīre kızı Fâtıma’ya münhasıra olduğu şer‘an sâbit oldukdan sonra kendi tarafından asîl ve kızı mezbûre Sâliha tarafından husûs-ı âti’l-beyâna sâbitü’l-vekâle vekîli olup ve sagīre-i mezbûre Fâtıma’nın tesviye-i umûruna vasîsi olan bâ‘isetü hâze’l-kitâb mezbûre diğer Hatice mahzarında ikrâr ve takrîr-i kelâm edip oğlum müteveffâ-yı mezbûr Mehmed Çelebi’nin terekesinden olup mahalle-i mezbûrede vâki‘ bir tarafdan Ebûbekir b. Mehmed mülkü ve bir tarafdan Musa b. Ali mülkü ve bir tarafdan Ümmühâni Hâtun menzili ve bir tarafdan tarîk-i âm ile mahdûd büyût-ı adîdeyi müştemil menzilimi, bi cümleti’t-tevâbi‘ ve’l-levâhık mezbûre diğer Hatice Hâtun’a yüz altmış esedî guruşa bey‘-i kat‘î ile bey‘ ve teslîm mezbûre diğer Hatice dahi asâleten ve vekâleten ve vesâyeten iştirâ ve tesellüm ettiğinden sonra semen-i mezbûr altmış guruşu oğlum müteveffâ-yı mezbûr Mehmed Çelebi’nin zimmetinde müteveffâ-yı mezbûr Ahmed Çelebi’ye deyni olan altmış guruşa takās, mezbûre diğer Hatice Hâtun dahi mukāssa ve kabûl eyledi ba‘de’l-yevm menzil-i mahdûd-ı mezkûr müteveffâ-yı mezbûr Ahmed Çelebi’nin terekesinden olmak üzre mezbûrât diğer Hatice ve Sâliha ve Fâtıma’nın mülkleri ve hakk-ı sarflarıdır dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî gurreti Saferi’l-hayr li sene seb‘a ve semânîn ve elf. Şuhûdü’l-hâl: Hüseyin Çelebi b. Ahmed, Ali Efendi b. Abdurrahman, Mehmed Çelebi b. İsmail, Mehmed Çelebi b. Mehmed, Dilaver Çavuş b. Abdullah, el-Hâc Hüseyin b. Mehmed, İbrahim Çelebi b. Mehmed, İbrahim Çelebi b. Mehmed, Mehmed Ağa b. Abdullah ve gayruhüm.