İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 139 Hüküm no: 89 Orijinal metin no: [22a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hızır Bey mahallesinden vefat eden Hasan Beşe’nin terekesi konusunda vârisleri ile vasîsi arasındaki alacak davasının sonuçlandığı Mahmiye-i İstanbul’da Hızır Bey mahallesinde sâkin iken bundan akdem vefât eden Hasan Beşe b. Yusuf nâm kimesnenin verâseti li ebeveyn karındaşları İbrahim ve Halil nâm kimesnelere münhasıra olduğu şer‘an sâbit oldukdan sonra mezbûr İbrahim kendi tarafından asâleten ve mezbûr Halil tarafından husûs-ı âti’l-beyâna nehc-i şer‘î üzre vekîl olduğu sâbit olmağla vekâleten meclis-i şer‘-i şerîfde müteveffâ-yı mezbûrun vasiyy-i muhtârı ve terekesine vâzı‘ü’l-yed olan bâ‘is-i hâze’l-kitâb Ahmed Bey b. Ömer nâm kimesne mahzarında ikrâr ve takrîr-i kelâm edip mûrisim müteveffâ-yı mezbûr nukūd-ı terekesinden otuz beş guruş nakid ki ve müteveffâ-yı mezbûrdan bey‘ ettiği attâr metâ‘ı semeninden dokuz guruş min haysi’l-mecmû‘ makbûzu olan kırk dört guruşu mezbûr Ahmed Bey’den taleb ve da‘vâ ettiğimden, ol dahi cevâbında müteveffâ-yı mezbûrun terekesinden yirmi iki guruş nakid ve attâr metâ‘ı semeninden dokuz guruş cem‘an makbûzum ancak otuz bir guruş olup meblağ-ı mezbûrun on yedi buçuk guruşu müteveffâ-yı mezbûrun techîz ve tekfînine sarf etmiş idim yedimde ancak on üç buçuk guruşu bâkī kalmış idi demekle beynimizde nizâ‘-ı küllî vukū‘undan sonra muslihûn tavassut edip mezbûr Ahmed Bey ile beynimizde yirmi altı guruş üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûr yirmi altı guruş mezbûr Ahmed Bey yedinden ahz u kabz ettiğimden sonra müteveffâ-yı mezbûrun terekesine müte‘allika âmme-i da‘vâdan mezbûr Ahmed Bey’in zimmetini ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî yevmi’s-sânî min Saferi’l-hayr li sene seb‘a ve semânîn ve elf. Şuhûdü’l-hâl: Ali Efendi el-İmâm, Mehmed Bey b. Mehmed?, Mehmed Çelebi b. Ahmed, Ahmed b. Receb, Mustafa b. Mehmed, Ebûbekir b. Şâkir?, Mustafa Çelebi b. Mehmed Efendi ve gayruhüm.