İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 140 Hüküm no: 90 Orijinal metin no: [22a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Abdullah’ın muhâla‘a yoluyla boşandığı Süleyman b. Ali’den nafaka talebinin reddi Mahmiye-i İstanbul’da Burmalı Mescid mahallesinde sâkine Sâliha bt. Abdullah nâm hâtun, meclis-i şer‘-i şerîfde zevci Mustafa Süleyman b. Ali nâm kimesne mahzarında üzerine da‘vâ ve takrîr-i kelâm edip târih-i kitâbdan dört gün mukaddem mezbûr Süleyman ile zimmetinde mütekarrir ve ma‘kūdun-aleyh altı yüz akçe mehr-i müeccelim üzerine muhâla‘a edip ol dahi muhâla‘a-i mezbûreyi kabûl edip yedimden iktirâz ve kabz eylediği yüz elli akçe ile bir don ve bir gömlek bâkī kalmış idi hâlâ mezbûr Süleyman’a suâl olunup meblağ-ı mezbûr ile zikr olunan don ve gömlek alıverilip ve nafaka-i iddet ve me’ûnet-i süknâm için münkaziye? oluncaya değin mezbûr Süleyman üzerine kadr-ı ma‘rûf akçe takdîr olunmak matlûbumdur dedikde gıbbe’s-suâl mezbûr Süleyman cevâbında mezbûre Sâliha zimmetinde mütekarrir ve ma‘kūdun-aleyh olan mehr-i müeccelim ve nafaka-i iddet-i mu‘ayyenesi üzerlerine da‘vâ ve yedinden ahz eylediğim meblağ-ı mezbûr yüz elli akçe ve bir don olup ve bir gömlek benim olup ve me’ûnet-i süknâsı dahi kendi üzerine olmak üzre benim ile muhâla‘a olup ben dahi muhâla‘a-i mezbûreyi kabûl eylediğimden sonra hukūk-ı zevciyyete ve gayra müte‘allika da‘vâdan her birimiz âharın zimmetini ibrâ etmiş idik deyû def‘le mukābele edicek gıbbe’l-istintâk ve’l-inkâr mezbûr Süleyman’dan def‘-i mezbûrunu mübeyyine beyyine taleb olundukda mahmiye-i mezbûrede Baba Hasan Alemî mahallesinde sâkin Osman b. Ali ve Abdülkādir b. Ali ve Ali b. Mehmed li ecli’ş-şehâde meclis-i şer‘a hâzırûn olup istişhâd olunduklarında fi’l-hakīka mezbûre Sâliha mezbûr Süleyman zimmetinde mütekarrir ve ma‘kūdun-aleyh olan altı yüz akçe mehr-i müecceli ve nafaka-i iddet-i mu‘ayyenesi üzerlerine ve meblağ-ı mezbûr yüz elli akçe ve don ve bir gömlek üzerlerine ve me’ûnet-i süknâsı dahi kendi üzerine olmak üzre dahi mezbûr Süleyman ile bizim huzûrumuzda muhâla‘a olup mezbûr Süleyman dahi muhâla‘a-i mezbûreyi kabûl ettiğinden sonra hukūk-ı zevciyyete ve gayra müte‘allika âmme-i de‘âvâdan her biri âharın zimmetini ibrâ ve iskāt eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde [ba‘de’t-] ta‘dîl ve’t-tezkiyye şehâdetleri makbûle olmağın mûcebince mezbûre Sâliha ber vech-i muharrer mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’l-hâmis Saferi’l-hayr li sene seb‘a ve semânîn ve elf. Şuhûdü’l-hâl: İbrahim b. Mehmed, Osman b. Ömer, Ebûbekir b. Hüseyin, Mustafa b. Şaban ve gayruhüm mine’l-hâzırîn.