İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 141 Hüküm no: 91 Orijinal metin no: [22b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bakkal Kosta v. Yani’nin Yorgi v. Nikola’ya olan borcunu kabul ettiği Mahmiye-i İstanbul’da Balatkapısı dâhilinde el-Hâc İsâ mahallesinde sâkin bâ‘is-i hâze’l-vesîka Yorgi v. Nikola nâm zimmî meclis-i şer‘-i şerîfde bakkal tâ’ifesinden Kosta v. Yani nâm zimmî mahzarında üzerine da‘vâ ve takrîr-i kelâm edip mezbûr Kosta zimmetinde bundan akdem yedinden iştirâ ve kabz eylediği beynimizde ma‘lûm bakkal metâ‘ı semeninden otuz sekiz bin akçe hakkım olup meblağ-ı mezbûrun on sekiz bin dört yüz on akçesini mukaddemâ mezbûr Kosta yedinden ahz u kabz edip on dokuz bin [beş yüz] doksan akçesi zimmetinde bâkī kalmağın hâlâ merkūm Kosta’ya suâl olunup meblağ-ı bâkī-i mezbûr on dokuz bin beş yüz doksan akçenin alıverilmesi matlûbumdur dedikde gıbbe’s-suâl mezbûr Kosta cevâbında fi’l-hakīka müdde‘î-i mezbûra bundan akdem ber vech-i muharrer yedinden iştirâ ve kabz eylediği mârrü’z-zikr bakkal metâ‘ı bahâlarından zimmetinde bâkī on dokuz bin beş yüz doksan akçe vâcibü’l-edâ deyni olduğunu tav‘an ikrâr ve i‘tirâf etmeğin mûcebince meblağ-ı bâkī-i mezbûr on dokuz bin beş yüz doksan akçeyi müdde‘î-i mezbûr Yorgi’ye edâ ve teslîme merkūm Kosta’ya tenbîh olunmağın mâ vaka‘a bi’t-taleb ketb olundu. Fî gurreti Saferi’l-hayr li sene seb‘a ve semânîn ve elf. Şuhûdü’l-hâl: El-Hâc Ahmed b. Ali, İbrahim b. Ahmed, Mehmed Efendi b. Mehmed, Veli Beşe b. Mahmud, Dimitraki v. Kostantin, Todori v. Manol, Panayot v. İstati, Todor v. Dimo.