İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 141 Hüküm no: 92 Orijinal metin no: [22b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şaban b. Ali’nin vasiyeti kaydı Husûs-ı âti’l-beyânın mahallinde tahrîr[i] iltimâs olunmağın savb-ı şer‘den Mevlânâ Mehmed Efendi b. Nasûh irsâl olunup ol dahi Şaban b. Ali’nin mahmiye-i İstanbul’da Beyceğiz mahallesinde sâkin olduğu menziline varıp zeyl-i kitâbda muharrerü’l-esâmî olan müslimîn huzûrunda akd-i meclis-i şer‘-i mübîn eyledikde mezbûr Şaban meclis-i ma‘kūd-ı mezbûrda bâ‘is-i hâze’l-kitâb Ali b. Receb nâm kimesne mahzarında ikrâr ve takrîr-i kelâm edip bi emrillâhi te‘âlâ dâr-ı fenâdan dâr-ı bekāya intikāl ettiğimde ancak malım olan altı bin akçenin iki bin dört yüz akçesi sünnet-i seniyye üzre techîz ve tekfînime ve iskāt-ı salâtıma sarf olunup ve bin akçesi zevcem Fâtıma bt. Ahmed nâm hâtunun zimmetimde mütekarrir ve ma‘kūdun-aleyh mehr-i müecceli için verilip iki bin altı yüz akçesi dahi yine zevcem mezbûre Fâtıma’ya verilip ve menzil-i mezbûre içinde mevcûd olan mukaffel ve memhûr bir sepet sandığı içinde olan kütüb ile on yastık kılıfı ve iki beledî döşek kılıfı ve üç minder kılıfı ve bir köhne orta keçesi ve bir güğüm ve bir tencere ve bir kahve ibriği dahi üveyi kızım gāib ani’l-meclis Kerime nâm hâtunun mülküdür, mezbûre Kerime’ye teslîm oluna ve menzil-i mezbûrda olan sâir esâs-ı beyt ve evânî-i nühâsiyye ve gayri nühâsiyye ve bi’l-cümle ism-i mâl ıtlâk olunur cemî‘ eşyâ dahi mezbûre Fâtıma’nın mülküdür, benim alâka ve medhalim yoktur deyû ber vech-i muharrer vasiyyet edip tenfîzine mezbûr Ali’yi vasiyy-i muhtâr nasb ve ihtiyâr eyledim, vasiyy-i mezbûr Ali dahi vesâyet-i mezbûreyi kabûl eyledi dedikde gıbbe’t-tasdîki’ş-şer‘î husûs-ı mezbûru Mevlânâ-yı mezbûr mahallinde tahrîr ve ma‘an irsâl olunan Derviş b. Veli ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sânî min Saferi’l-hayr li sene seb‘a ve semânîn ve elf. Şuhûdü’l-hâl: Mustafa Çelebi b. Abdullah, Mustafa Çelebi b. Mahmud el-Müezzin, Mahmud Çelebi b. Muharrem el-Müezzin, Ahmed Efendi? b. Abdullah, Veli Çelebi b. el-Hâc Mehmed, Mehmed Çelebi b. Müstakim, Mehmed Çelebi b. Abdünnebi, Şaban b. Hasan ve gayruhüm.