İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 142 Hüküm no: 93 Orijinal metin no: [22b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Ali b. Hüseyin’in evini Çorlu ahalisinden Mustafa b. Himmet’e sattığı ve alacağını taksite bağladığı Mahmiye-i İstanbul’da Acıçeşme mahallesinde sâkin Seyyid Ali b. Hüseyin nâm kimesne meclis-i şer‘de vilâyet-i Rumeli’nde kasaba-i Çorlu ahâlîsinden Kasaboğlu demekle ma‘rûf Mustafa b. Himmet nâm kimesne mahzarında ikrâr ve takrîr-i kelâm edip silk-i mülkümde münselik olup kasaba-i mezbûrda İmâret mahallesinde vâki‘ bir tarafdan Haydar oğlu menzili ve iki tarafdan merhûm Sultan Selim Hân medreseleri ve taraf-ı râbi‘i tarîk-i âm ile mahdûd fevkānî bir bâb oda ve tahtânî bir bâb oda ve havluyu müştemil olan mülk menzilimi, bi cümleti’t-tevâbi‘ ve’l-levâhık ve’l-hukūk ve’l-merâfık [bey‘ edip] dört bin sekiz yüz akçenin iki bin beş yüz akçesini mezbûr Mustafa yedinden ahz u kabz edip bâkī iki bin üç yüz otuz [akçesini] dahi hâlâ edâya iktidârı olmamağla te’cîle tâlib olmağın ben dahi meblağ-ı bâkī-i mezbûru târih-i kitâbdan yüz seksen gün tamâmına değin te’cîl edip mezbûr Mustafa dahi eyyâm-ı mezbû[r] hulûlüne değin meblağ-ı bâkī-i [23a] mezbûr iki bin üç yüz akçeyi tamâmen bana edâya ta‘ahhüd ve iltizâm ettiğinden sonra menzil-i mahdûd-ı mezbûru mahallinde kabz ve tasarrufa mezbûr Mustafa’ya taslît eyledim, menzil-i mahdûd-ı mezbûr ba‘de’l-yevm merkūm Mustafa’nın mülk-i müşterâsıdır. Keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ min Saferi’l-hayr li sene seb‘a ve semânîn ve elf. Şuhûdü’l-hâl: Ahmed b. Mehmed, Hüseyin b. Abdullah, Hasan b. Keyvan, Ahmed b. Şaba[n].