İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 143 Hüküm no: 94 Orijinal metin no: [23a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mosi v. Menteş isimli yahudiye Ömer b. Yakub’un oda ve dükkân kirasından borcu olmadığı Mahrûse-i Üsküdar müzâfâtından Kuzguncuk nâm karye ahâlîsinden Mosi v. Menteş nâm yahudi meclis-i şer‘-i şerîfde bâ‘is-i hâze’l-kitâb Ömer b. Yakub nâm kimesne mahzarında üzerine da‘vâ ve takrîr-i kelâm edip mezbûr Ömer târih-i kitâbdan on yedi ay mukaddem mahmiye-i İstanbul’da Gümrük kurbunda Balıkpazarı’nda vâki‘ beyne’l-ahâlî ve’l-cîrân ma‘lûmü’l-hudûd yevmî sekiz akçeye olmak üzre bir dükkânımı ve dükkân-ı mezbûr üzerinde vâki‘ beşer akçeye olmak üzre bir odayı îcâr ve teslîm ol dahi ber vech-i muharrer istîcâr ve tesellüm ettiğinden sonra mârrü’z-zikr dükkân ve oda ücretlerinden târih-i kitâba gelince mezbûr Ömer zimmetinde min haysi’l-mecmû‘ altı bin altı yüz otuz akçe hakkım olmağla hâlâ suâl olunup meblağ-ı mezbûrun alıverilmesi matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin fi’l-hakīka müdde‘î-i mezbûrun sâlifü’z-zikr oda ile dükkânını vech-i muharrer üzre istîcâr etmeyip elân oda-i mezkûr ile dükkân-ı mezbûr ücretlerinden müdde‘î-i mezbûra ber vech-i muharrer zimmetinde altı bin altı yüz otuz akçe lâzımü’l-edâ deyni olmadığına mezbûr Ömer’e yemîn teklîf olundukda ol dahi alâ hasebi’l-mes’ûl yemîn billâhi’l-aliyyi’l-a‘lâ etmeğin mûcebince müdde‘î-i mezbûr ber vech-i muharrer mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: İbrahim b. Mehmed, Ebûbekir b. Hüseyin, Mehmed b. Mehmed, Abdullah Efendi el-kâtib ve gayruhüm.