İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 143 Hüküm no: 95 Orijinal metin no: [23a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Bey b. Sefer’e Ayşe Hâtun bt. Abdüllatif’in borcunu eda etmesi gerektiği Nişân-ı şerîf-i âlîşân-ı sâmî-mekân Mahmiye-i İstanbul’da Aşkī mahallesinde sâkin bâ‘is-i hâze’l-kitâb Ali Bey b. Sefer nâm kimesne meclis-i şer‘-i şerîfde mahmiye-i merkūmede Cafer Subaşı mahallesinde sâkine olup zâtı ma‘rifet-i şer‘iyye ile ârifân Veli Beşe b. Mahmud ve Mahmud Çavuş b. Hüseyin nâm kimesneler ma‘rifetleriyle mu‘arrefe olan Ayşe Hâtun bt. Abdüllatîf mahzarında üzerine da‘vâ ve takrîr-i kelâm edip mezbûre Ayşe Hâtun zimmetinde cihet-i karz-ı şer‘îden yüz elli altı esedî guruş hakkım olmağla suâl olunup meblağ-ı mezbûrun alıverilmesi matlûbumdur dedikde gıbbe’s-suâl mezbûre Ayşe Hâtun cevâbında fi’l-hakīka müdde‘î-i mezbûra cihet-i mezkûreden yüz elli altı esedî guruş zimmetimde vâcibü’l-edâ deynimdir deyû tâyi‘aten ikrâr ve i‘tirâf etmeğin mûcebiyle meblağ-ı mezbûr yüz elli altı esedî guruşu müdde‘î-i mezbûra edâ ve teslîme mezbûre Ayşe Hâtun’a tenbîh olunmağın mâ vaka‘a bi’t-taleb ketb olundu. Fi’l-yevmi’s-sâdis min Saferi’l-muzaffer li sene seb‘a ve semânîn ve elf. Şuhûdü’l-hâl: Mehmed Çavuş el-Mübâşir, Mehmed Çelebi b. Ahmed, Ahmed Çelebi b. Ahmed, İbrahim Çelebi b. Ahmed ve gayruhüm.