İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 144 Hüküm no: 96 Orijinal metin no: [23a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rum Patriği Bartinos’un eski Rum patriğinin Osman Paşa’ya olan borcunu üstlendiği ve metrepolitlerin buna kefil olduğu Min hattıhî Husûs-ı âti’l-beyânın mahallinde tahrîri iltimâs olunmağın savb-ı şer‘-i kavîm-i lâzımü’t-ta‘zîmden Mevlânâ Abdurrahman b. İbrahim irsâl olunup ol dahi Dârü’l-hilâfeti’l-aliyye Kostantıniyye el-mahmiye -humiyet ani’l-âfât ve’l-beliyye-hısnı ebvâbından Fenerkapısı dâhilinde Rum patriği olanlar sâkin oldukları menzile varıp zeyl-i rakīmde isimleri terkīm olunan udûl-i müslimîn ve sikāt-ı muvahhidîn mahzarlarında akd-i meclis-i şer‘-i mübîn eyledikde bi’l-fi‘l Rum patriği olan Bartinos v. Simo nâm râhib meclis-i ma‘kūd-ı mezkûrede hâlâ kāimmakām-ı sadâret-i uzmâ ve nâib-i menâb-ı vekâlet-i kübrâ olan düstûr-ı ekrem müşîr-i efham nizâmü’l-âlem nâzım-ı menâzımü’l-ümem sa‘âdetlü Osman Paşa -dâme berruhû ve feşâ-hazretleri taraf-ı bâhirü’ş-şereflerinden husûs-ı câ’i’l-beyâna vekîl olduğu mahmiye-i [23b] mezbûre mahallâtından Karaki Hüseyin Çelebi mahallesi sâkinlerinden Ahmed Ağa b. el-Hâc Hasan ve Küçük Karaman kurbunda Pîrinççi Sinan mahallesi sâkinlerinden Osman Ağa b. Mehmed nâm kimesneler şehâdetleri ile şer‘an sâbit olan umdetü erbâb-ı tahrîr ve’l-kalem zübdetü ashâb-ı tastîr ve’r-rakam Ömer Efendi b. Mehmed nâm kimesne mahzarında bi’t-tav‘i’s-sâf ikrâr ve i‘tirâf edip bundan mukaddem Rum patriği olan Diyonisyos v. Atrasimyos nâm râhib müvekkil-i müşârün-ileyh hazretlerine zimmetinde vâcibü’l-edâ ve lâzımü’l-kazâ deyni olan on bin kıt‘a esedî guruş deyni için rızâmız ile müvekkil-i mûmâ-ileyh hazretlerini havâle-i sahîha-i şer‘iyye ile benim üzerime havâle edip ben dahi havâle-i mezbûreyi kabûl eylemeğin müvekkil-i müşârün-ileyh hazretlerine cihet-i havâle-i mezkûreden zimmetimde vâcibü’l-edâ ve lâzımü’l-kazâ on bin kıt‘a esedî guruş deynim vardır dedikde gıbbe’t-tasdîki’l-mu‘teber kendi tarafından asîller ve Vidin metrepolidi Danyal ve Ahyolu metrepolidi diğer Danil ve Misivri metrepolidi Tevafani ve Kayseriye metrepolidi Gregoryos ve İznik metrepolidi Sofranyos ve Bursa metrepolidi Kalanikos ve Dimetoka metrepolidi Gregoryos ve Ilıca metrepolidi Teodosyos ve Rodos metrepolidi Yuvakim ve Midilli metrepolidi diğer Gregoryos ve Sakız metrepolidi Yerasimos ve Malkara metrepolidi Makaryos ve Niksar metrepolidi Kiryos ve Finike metrepolidi Zaharyas ve Menekşe metrepolidi Lavranoyos ve Anabolu metrepolidi Krilos ve Ağrıboz metrepolidi diğer Danil ve İstefe metrepolidi Zikil ve Kapıdağı metrepolidi Metrekani ve Edirne metrepolidi Fenafitos ve Tırnova metrepolidi diğer Zikil ve Filibe metrepolidi Diyonisyos ve Selânik metrepolidi Kalanikos ve Yenişehir metrepolidi Yakovas ve Siroz metrepolidi diğer Krilos ve Narda metrepolidi Vartalomos ve Ballıbadra metrepolidi diğer Danil ve Gördös metrepolidi ve Vekalistos ve Sofya metrepolidi Melinos ve Amasya metrepolidi Yerasimos ve Yanya metrepolidi diğer Krilos ve Silistre metrepolidi diğer Makaryos ve Varna metrepolidi âhar Makaryos ve Karaferye metrepolidi Yavaki ve İzmir metrepolidi diğer Makaryos ve Gümülcine metrepolidi Ayayina ve İsmail metrepolidi Lorendi nâm râhibler taraflarından nehc-i şer‘î üzre sâbitetü’l-vekâle vekîller olup İznikmid metrepolidi olan Teofitos v. Mihal ve Ereğli metrepolidi olan Tolomos v. Mataryos ve Kadıköy metrepolidi olan Yeremya v. Kristi ve Mizistre metrepolidi olan Serdori v. Plohroni ve Terkos metrepolidi olan Makaryos v. Yorgi ve Silivri metrepolidi olan Antimos v. Todori nâm râhiblerden her biri bi’l-asâle ve’l-vekâle meblağ-ı mezbûr on bin kıt‘a esedî guruşa kefîl ve zâmin olduk dediklerini Mevlânâ-yı mezbûr mahallinde tahrîr, ba‘de ma‘an irsâl olan İbrahim b. Halil ve İvaz b. Abdülmennân ile meclis-i şer‘-i hatîre gelip alâ vukū‘ihi inhâ ve takrîr eylediklerinde mâ hüve’l-vâki‘ bi’l-ibtigā ketb ve imlâ olundu. Fi’l-yevmi’s-sâlis min Saferi’l-muzaffer li sene seb‘a ve semânîn ve elf. Şuhûdü’l-hâl: Mehmed Ağa b. Abdülkādir, Osman Ağa b. Mehmed, Bektaş Beşe b. Ahmed, Mehmed Beşe b. Abdülmennân, Ahmed Beşe b. Abdullah, Ali Beşe b. Hüseyin, Hasan Beşe b. Receb, Osman Beşe b. Süleyman, diğer Mehmed Beşe b. Abdüssettar ve gayruhüm mine’l-hâzırîn.