İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 145 Hüküm no: 97 Orijinal metin no: [23b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Baş tezkireci Hasan Efendi’nin eski Rum Patriği Diyonisyos’tan alacağını yeni patrik Bartinos v. Simo’ya havale ettiği ve bu borca metrepolitlerin de kefil olduğu Husûs-ı âti’l-beyânın mahallinde tahrîr[i] iltimâs olunmağın savb-ı şer‘-i kavîm-i lâzımü’t-ta‘zîmden Mevlânâ Abdurrahman Efendi b. İbrahim irsâl olunup ol dahi Dârü’l-hilâfeti’s-seniyye Kostantıniyye-i mahmiye -humiyet ani’l-âfât-hısnı ebvâbından Fenerkapısı dâhilinde Abdi Subaşı mahallesinde Rum patriği olanlar sâkin oldukları menzile varıp zeyl-i sütûrda zeyl-i mastûre olan müslimîn mahzarlarında meclis-i şer‘-i mübîn eyledikde mahmiye-i mezkûrede hâlâ kāimmakām-ı sadâret-i uzmâ ve nâib-i menâb-ı vekâlet-i kübrâ olan, düstûr-ı ekrem müşîr-i efham nizâmü’l-âlem nâzım-ı menâzımü’l-ümem sa‘âdetlü Osman Paşa -dâme birruhû ve feşâ-hazretlerinin hâliyâ baş tezkirecileri olan umde[tü] erbâb-ı inşâ ve’l-intişâ zübdetü ashâbü’t-tastîr ve’l-imlâ Hasan Efendi taraflarından husûs-ı câ’i’z-zikre vekîl olup mahmiye-i mezbûre mahallâtından Karaki Hüseyin Çelebi mahallesi sâkinlerinden Ahmed Çelebi b. el-Hâc Hasan ve Küçük Karaman kurbunda Pîrinççi Sinan mahallesi sâkinlerinden Osman Ağa b. Mehmed nâm kimesneler şehâdetleri ile şer‘an vekâleti sâbite olan umdetü erbâbü’t-tahrîr ve’l-kalem zübdetü ashâbü’t-tastîr ve’r-rakam Ömer Efendi b. Mehmed nâm kimesne meclis-i ma‘kūd-ı mezbûrda bi’l-fi‘l Rum patriği olan Bartinos v. Simo nâm râhib muvâcehesinde takrîr-i kelâm ve ta‘bîr ani’l-merâm edip müvekkilim müşârün-ileyh Hasan Efendi’nin merkūm Bartinos’dan mukaddem Rum patriği olan merkūm Diyonisyos zimmetinde bin kıt‘a esedî guruş hakkı olup merkūm Diyonisyos’un dahi Bartinos zimmetinde bin kıt‘a esedî guruş hakkı olmağın merkūm Diyonisyos müvekkilim müşârün-ileyh Hasan Efendi’yi merkūm Bartinos üzerine üçü bir yerde iken rızâları ile havâle-i sahîha-i şer‘iyye ile havâle edip ol dahi havâle-i mezbûreyi kabûl eylemeğin müvekkil-i müşârün-ileyh Hasan Efendi’nin cihet-i havâle-i mezkûrdan merkūm Bartinos zimmetinde bin kıt‘a esedî guruş hakkı vardır, suâl olunup takrîri tahrîr olunmak matlûbumdur dedikde gıbbe’s-suâl merkūm Bartinos cihet-i havâle-i mezkûrdan müvekkil-i müşârün-ileyh Hasan Efendi’ye zimmetimde vâcibü’l-edâ ve lâzımü’l-kazâ bin kıt‘a esedî guruş deynim vardır deyû bi’t-tav‘i’s-sâf ikrâr ve i‘tirâf ettiğinden sonra kendiler taraflarından asîller ve Vidin metrepolidi Danil ve Ahyolu metrepolidi diğer Danil [ve] Misivri metrepolidi Tevafani ve Kayseriye metrepolidi Gregoryos ve İznik metrepolidi [24a] Sofranyos ve Bursa metrepolidi Kalanikos ve Dimetoka metrepolidi Gregoryos ve Ilıca metrepolidi Teodosyos ve Rodos metrepolidi Yavakim ve Midilli metrepolidi diğer Gregoryos ve Sakız metrepolidi Yerasimos ve Malkara metrepolidi Makaryos ve Niksar metrepolidi Kiryos ve Finike metrepolidi Zaharyas ve Menekşe metrepolidi Lavranoyos ve Anabolu metrepolidi Krilos ve Ağrıboz metrepolidi diğer Danil ve İstefe metrepolidi Zikil ve Kapıdağı metrepolidi Metrekani ve Edirne metrepolidi Fenafitos ve Tırnova metrepolidi diğer Zikil ve Filibe metrepolidi Diyonisyos ve Selânik metrepolidi Kalanikos ve Yenişehir metrepolidi Yakovas ve Siroz metrepolidi diğer Krilos ve Narda metrepolidi Vartolomos ve Ballıbadra metrepolidi diğer Danil ve Gördös metrepolidi Vakalistos ve Sofya metrepolidi Melinos ve Amasya metrepolidi Yerasimos ve Yanya metrepolidi diğer Krilos ve Silistre metrepolidi diğer Makaryos ve Varna metrepolidi âhar Makaryos ve Karaferye metrepolidi Yavaki ve İzmir metrepolidi diğer Makaryos ve Gümülcine metrepolidi Ayayina ve İsmail metrepolidi Lorendi nâm râhibler taraflarından husûs-ı câ’i’l-beyâna nehc-i şer‘î ve tarîk-i mer‘î üzre sâbitetü’l-vekâle vekîller olup İznikmid metrepolidi olan Teofitos v. Mihal ve Ereğ[l]i metrepolidi olan Tolomos v. Mataryos ve Kadıköy metrepolidi olan Yeremya v. Kristi ve Mizistre metrepolidi olan Serdori v. Plohroni ve Terkos metrepolidi olan Makaryos v. Yorgi ve Silivri metrepolidi olan Antimos v. Todori nâm râhibler her biri mine’l-asâle ve’l-vekâle meblağ-ı mezkûr bin kıt‘a esedî guruşa kefîl ve zâmin olduk dediklerini Mevlânâ-yı mezbûr mahallinde tahrîr, ba‘de ma‘an irsâl olunan İbrahim b. Halil ve İvaz b. Abdülmennân ile meclis-i şer‘-i hatîre gelip alâ vukū‘ihi inhâ ve takrîr eylediklerinde mâ hüve’l-vâki‘ bi’l-ibtigā ketb ve imlâ olundu. Fi’l-yevmi’s-sâlis min Saferi’l-muzaffer li sene seb‘a ve semânîn ve elf. Şuhûdü’l-hâl: Mehmed Ağa b. Abdülkādir, Osman Ağa b. Mehmed, Bektaş b. Ahmed, Mehmed Beşe b. Abdülmennân, Ahmed Beşe b. Abdullah, Ali Beşe b. Hüseyin, Hasan Beşe b. Receb, Osman Beşe b. Süleyman, diğer Mehmed Beşe b. Abdüssettar ve gayruhüm mine’l-hâzırîn.