İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 147 Hüküm no: 98 Orijinal metin no: [24a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emetullah bt. İsmail’in kocası İvaz b. Mehmed’den muhâla‘a yoluyla boşandığı Mahmiye-i İstanbul’da Sultan Hamamı mahallesi sâkinlerinden Emetullah bt. İsmail nâm hâtun meclis-i şer‘-i şerîfde zevc-i muhâlı‘ı bâ‘is-i hâze’l-kitâb İvaz b. Mehmed nâm kimesne mahzarında ikrâr ve takrîr-i kelâm edip zevcim mezbûr İvaz zimmetinde mütekarrir ve ma‘kūdun-aleyh mehr-i müeccelim olan bin iki yüz akçe üzerine ve nafaka-i iddet-i ma‘lûmem kendi üzerime olup ve me’ûnet-i süknâm dahi kendi üzerime olmak üzre zevcim mezbûr İvaz ile muhâla‘a-i sahîha-i şer‘iyye ile muhâla‘a olup ol dahi [muhâla‘a-i] mezbûreyi kabûl eylediğinden sonra hukūk-ı zevciyyete müte‘allika âmme-i da‘vâdan her birimiz âharın zimmetini ibrâ-i âmm-ı kātı‘ü’l-hısâm ile ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min Saferi’l-hayri’l-muzaffer li sene seb‘a ve semânîn ve elf. Şuhûdü’l-hâl: Mehmed b. Ali, Habib b. İbrahim, İbrahim Çelebi b. Ahmed, Ali b. Bâli, Hüseyin b. Mustafa ve gayruhüm mine’l-hâzırîn.