İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 147 Hüküm no: 99 Orijinal metin no: [24a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi’nin ortakçısı Yani v. Hristo zimmetindeki alacağının vârisleri tarafından tahsil edildiği Mahmiye-i İstanbul’da Mercan Ağa mahallesinde sâkin iken bundan akdem vefât eden Mehmed Çelebi b. Bayezid nâm kimesnenin verâseti zevce-i metrûkeleri Yasemin bt. Abdullah ve Dilgüşâ bt. Abdullah nâm hâtunlar ile sulbî kebîr oğlu Ahmed ve sulbî sagīr oğlu Mehmed ve sulbiye sagīre kızları Havvâ ve Hatice’ye münhasıra olduğu şer‘an zâhir ve mütehakkik oldukdan sonra mezbûrûn Ahmed ve Yasemin ve Dilgüşâ taraflarından husûs-ı âti’l-beyâna vekîlleri olduğu yedinde olan mazmûn-ı münîf-ı hüccet-i şer‘iyye ile sâbit olup ve sagīrûn-ı mezbûrûn Mehmed ve Havvâ ve Hatice’nin tesviye-i umûrlarına taraf-ı şer‘den mansûb vasîleri olan el-Hâc Mehmed Efendi b. Abdurrahman nâm kimesne meclis-i şer‘de bâ‘is-i hâze’s-sifr Yani v. Hristo nâm zimmî mahzarında asâleten ve vekâleten ikrâr ve takrîr-i kelâm edip bundan akdem merkūm Yani ile müteveffâ-yı mezbûr Mehmed Çelebi hayâtında mahmiye-i mezbûrede Kuyumcular fırınında ekmekçilik san‘atında şerîkler olup mâl-ı şirket-i mezbûrdan ba‘de küllî hesâb müteveffâ-yı mezbûrun mezbûr Yani zimmetinde on dört bin akçe hakkı bâkī kalıp kable’l-ahz mezbûr Mehmed Çelebi vefât etmekle ben dahi meblağ-ı bâkī-i mezbûru mezbûr Yani’den vekâleten ve vesâyeten taleb ve da‘vâ ettiğimde ol dahi inkâr edip ben dahi müdde‘âmı isbâta kādir olmayıp mezbûrun dahi yemîn etmesi mukarrer olmağla sulh sıgār-ı mezbûrûn hakkında dahi enfa‘ olmağın muslihûn tavassut edip mezbûr Yani ile beynimizde bin akçe üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr bin akçeyi mezbûr Yani yedinden tamâmen ahz u kabz ettikden sonra husûs-ı mezbûra müte‘allika da‘vâdan mezbûre-[24b] nin zimmetini bi’l-vekâle ve bi’l-vesâye ibrâ-i âmm-ı kātı‘ü’l-hısâm ile ibrâ ve iskāt edip ve mezbûr Yani zimmî beynlerinde ma‘lûm yüz yirmi beş guruş kıymetli beş re’s bârgire müte‘allika da‘vâdan mezbûrûn Ahmed ve Mehmed ve Yasemin ve Dilgüşâ ve Havvâ ve Hatice’den her birinin zimmetini ibrâ-i âm ile ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî min Saferi’l-hayr li sene seb‘a ve semânîn ve elf. Şuhûdü’l-hâl: Hasan Beşe b. el-Hâc Murad, Mahmud Çelebi b. Mustafa, el-Hâc Nasûh b. Mehmed, Halil Beşe b. Ahmed, Mehmed Ağa b. ( ) serzağarcı, İbrahim Çelebi b. Mehmed ve gayruhüm mine’l-hâzırîn.