İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 148 Hüküm no: 100 Orijinal metin no: [24b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil Beşe b. Receb’in İbrahim Beşe b. Mehmed’den alacağını tahsil ettiği Mahmiye-i İstanbul’da Hızır Bey mahallesi sükkânından Halil Beşe b. Receb nâm kimesne meclis-i şer‘-i şerîf-i hatîr-i lâzımü’t-tevkīrde bâ‘is-i hâze’l-kitâb İbrahim Beşe b. Mehmed nâm kimesne mahzarında ikrâr ve takrîr-i kelâm edip bundan akdem mezbûr İbrahim Beşe zimmetinde cihet-i karz-ı şer‘îden yirmi beş kıt‘a esedî guruş hakkım olup mezbûr İbrahim Beşe’den taleb ve da‘vâ eylediğimde, ol dahi inkâr etmeğin beynimizde münâza‘ât-ı kesîre ve muhâsamât-ı şedîde vukū‘undan sonra muslihûn tavassut edip beynimizde on kıt‘a esedî guruş üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûr on kıt‘a esedî guruşu mezbûr İbrahim Beşe yedinden tamâmen ahz u kabz eylediğimden sonra husûs-ı mezbûra müte‘allika da‘vâdan mezbûr İbrahim Beşe’nin zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin min Saferi’l-hayr li sene seb‘a ve semânîn ve elf min hicreti men lehü’l-izzi ve kemâlü’ş-şeref. Şuhûdü’l-hâl: El-Hâc Kasım b. Receb, Musa Efendi b. Mustafa, Hasan Beşe b. Mehmed, Ali Beşe b. Abdullah, el-Hâc Mahmud b. Abdullah, Mehmed Ağa kethüdâ-yı muhzırân ve gayruhüm.