İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 149 Hüküm no: 101 Orijinal metin no: [24b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ferhas b. Toros’un Divriği’de Eski Sağır mahallesindeki eviyle bağının vârisleri tarafından Avanos v. Elmas’a satıldığı Fi’l-asl vilâyet-i Anadolu’da kasaba-i Divriği’de Eski Sağır mahallesi ahâlîsinden olup mahmiye-i İstanbul’da Ali Paşa-yı atîk mahallesinde sâkine iken bundan akdem hâlike olan, Ferhas b. Toros nâm Nasrâniyye’nin verâseti sulbî kebîr oğlu Tanilba ile sulbiye kebîre kızı Marta’ya münhasıra olduğu şer‘an zâhir oldukdan sonra mezbûrân Tanil ve Marta meclis-i şer‘-i şerîfde bâ‘is-i hâze’s-sifr Avanos v. Elmas nâm zimmî mahzarında her biri ikrâr ve takrîr-i kelâm edip hâlike-i mezbûrenin terekesinden olup kasaba-i mezbûrede mârrü’z-zikr Eski Sağır mahallesinde vâki‘ bir tarafdan Manik Ermeni mülkü ve bir tarafdan Avanos Ermeni mülkü ve bir tarafdan Kestos Ermeni mülkü ve bir tarafdan tarîk-i âm ile mahdûd bir bâb oda ve kiler ve bir ahırı müştemil bir kıt‘a menzili ve yine mahalle-i mezbûrede vâki‘ iki tarafdan Verkili nâm zimmî bağı ve iki tarafdan tarîk-i âm ile mahdûd bağı cümle tevâbi‘ ve levâhıkları ile mezbûr Avanos’a on esedî guruş ile bir sîm balık dişi hançere tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bey‘ ol dahi ber vech-i muharrer iştirâ ve kabûl ettiğinden sonra semeni olan meblağ-ı mezbûr on esedî guruş ile mârrü’z-zikr hançeri mezbûr Avanos’un yedinden bi’t-tamâm ve’l-kemâl ahz u kabz edip zikr olunan menzili ve bağı mahallerinde zabta mezbûr Avanos’a taslît eyledik dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ min Saferi’l-hayr li sene seb‘a ve semânîn ve elf. Şuhûdü’l-hâl: Fenârî v. Sahak, Abraham v. Murat, Sanik v. Matık, Murat [v.] Keşiş, Kiruz v. Nosok ve gayruhüm.