İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 150 Hüküm no: 102 Orijinal metin no: [24b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hâtun bt. Abdullah’ın kocası Abdülhalim Efendi’den muhâla‘a yoluyla boşandığı Husûs-ı âti’l-beyânın mahallinde tahrîri için bi’l-iltimâs savb-ı şer‘-i şerîf-i enverden mevlâ[nâ] es-Seyyid Muharrem Efendi b. es-Seyyid İsmail Efendi irsâl olunup ol dahi umdetü’l-mevâli’l-izâm Abdülhalim Efendi b. Sâdi Efendi’nin mahmiye-i İstanbul’da el-Hâc Muhyiddin mahallesinde sâkin olduğu menziline varıp zeyl-i sahîhada muharrerü’l-esâmî olan müslimîn huzûrunda akd-i meclis-i şer‘-i mübîn eyledikde mûmâ-ileyh Abdülhalim Efendi’nin zevcesi olup zâtı ma‘rifet-i şer‘iyye ile ârifân mahalle-i mezbûre sükkânından Mustafa Efendi b. Mehmed ve Hasan Bey b. Mehmed ta‘rîfleriyle mu‘arrefe olan, fahrü’l-muhadderât Fâtıma Hâtun bt. Abdullah meclis-i ma‘kūd-ı mezbûrda mûmâ-ileyh Abdülhalim Efendi mahzarında ikrâr-ı tâm ve takrîr-i kelâm edip zevcim mûmâ-ileyh Abdülhalim Efendi zimmetinde mütekarrir ve ma‘kūdun-aleyh olan yetmiş guruş mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzre zevcem mûmâ-ileyh Abdülhalim ile muhâla‘a-i sahîha-i [25a] şer‘iyye ile muhâla‘a edip ol dahi muhâla‘a-i mezbûreyi kabûl eylediğinden sonra hukūk-ı zevciyyete müte‘allika da‘vâdan her birimiz âharın zimmetini ibrâ ve iskāt eyledik dedikde gıbbe’t-tasdîki’ş-şer‘î husûs-ı mezbûru Mevlânâ-yı mezbûr mahallinde tahrîr ve ma‘an irsâl olunan Durmuş b. Pîr Veli ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fi’s-sâdis min [Safer]i’l-hayr li sene seb‘a ve semânîn ve elf. Şuhûdü’l-hâl: Ahmed Efendi el-mu‘arref bi câmi‘-i Mihrimah, Mustafa Efendi b. Mehmed, Hüseyin Bey b. Mehmed, Mustafa Çelebi b. Ali.