İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 150 Hüküm no: 103 Orijinal metin no: [25a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tosya’nın Belen köyünden olup vefat eden Hasan Beşe b. el-Hâc Mehmed’in Mustafa Ağa b. Abdullah zimmetindeki alacağını kardeşi Musa Beşe’nin tahsil ettiği Vilâyet-i Anadolu’da kasaba-i Tosya’ya tâbi‘ Belen nâm karye ahâlîsinden olup medîne-i Bağdad’da vefât eden Hasan Beşe b. el-Hâc Mehmed nâm kimesnenin li eb er karındaşı ve hasren vârisi olan Musa Beşe nâm kimesne meclis-i şer‘-i şerîfde Mustafa Ağa b. Abdullah nâm kimesne tarafından husûs-ı âti’l-beyâna vekîl olup vekâleti mahmiye-i İstanbul’da Keçeci Pîrî mahallesi sâkinlerinden İmâm Ahmed Efendi b. Ali ve Ahmed Çelebi b. Mustafa nâm kimesneler şehâdetleriyle sâbite olan Mustafa b. Yunus nâm kimesne mahzarında ikrâr ve takrîr-i kelâm edip bundan akdem müvekkil-i mezbûr Mustafa Ağa bin seksen iki senesinde medîne-i mezbûrda ağa iken karındaşı mezbûr vefât ettikde, muhallefâtından dört yüz yirmi dört guruşu ahz u kabz etmekle bundan akdem meblağ-ı mezbûru taleb ve da‘vâ ettiğimde ol dahi inkâr etmeğin beynimizde münâza‘ât-ı kesîre ve muhâsamât-ı şedîde vâkı‘a olmuş idi el-hâletü hâzihî muslihûn tavassut edip müvekkil-i mezbûr Mustafa ile beynimizde yedi guruş üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûr yedi guruşu müvekkil-i mezbûr Mustafa Ağa yedinden tamâmen ahz u kabz ettiğimden sonra meblağ-ı mezbûr dört yüz yirmi dört guruşa müte‘allika da‘vâdan müvekkil-i mezbûr Mustafa Ağa’nın zimmetini ibrâ-i kātı‘ü’l-hısâm ile ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî min Saferi’l-hayr li sene seb‘a ve semânîn ve elf. Şuhûdü’l-hâl: El-Hâc Ramazan b. el-Hâc Şaban, Ahmed Efendi b. Ali el-İmâm, Ahmed b. Mustafa, Ali Çelebi b. Abdullah, Halil Çelebi b. İbrahim, Mustafa Çelebi b. Ahmed, Receb Beşe b. Ali, Hüseyin Çelebi b. Mehmed, Mustafa Çelebi b. İsmail.