İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 151 Hüküm no: 104 Orijinal metin no: [25a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Abdullah’ın Eğin kasabasındaki bağ hissesiyle oda ve ağaçlarını Serkis v. Avram’a sattığı Havâss-ı Refî‘a kazâsı müzâfâtından kasaba-yı Hasköy’de Kiremitçi Ahmed Çelebi mahallesi sâkinlerinden Ali b. Abdullah nâm kimesne meclis-i şer‘-i şerîfde bâ‘is-i hâze’s-sifr Serkis v. Avram nâm zimmî muvâcehesinde ikrâr ve takrîr-i kelâm edip vilâyet-i Anadolu’da Eğin kasabası kurbunda Murad kenarı nâm mevzi‘de vâki‘ bir tarafdan nehir ve bir tarafdan Revan ve bir tarafdan Hoker ve bir tarafdan Mardiros nâm zimmîler bağları ile mahdûd bir kıt‘a bağın üç sehimden bir sehm-i şâyi‘i mülküm ve hakkım olmağla zikr olunan bir sehim ile kasaba-i mezbûrede Mihren mahallesinde vâki‘ bir tarafdan Yusuf Ağa mülkü ve bir tarafdan Küçük Ali mülkü ve bir tarafdan Osman Bey mülkü ve bir tarafdan tarîk-i hâs ile mahdûd bir bâb odayı cümle tevâbi‘ ve levâhıkı ve kâffe-i hukūk ve merâfıkı ile ve nehr-i mezbûrun kenarında vâki‘ yedi aded mülk kavağımı bi safkatin vâhidetin mezbûr Serkis’e tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile otuz sekiz esedî guruşa bey‘ ol dahi iştirâ ve kabûl ettiğinden sonra semeni olan meblağ-ı mezbûr otuz sekiz esedî guruşu bana edâ ve teslîm ben dahi ahz u kabz edip zikr olunan bağın üç sehimden bir sehmini ve Odayı ve yedi kavağı mahallerinde zabta mezbûr Serkis’i taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Ali Çelebi b. ( ) cebeci, Mehmed Efendi b. Abdülkādir, Osman Bey b. Mehmed, Süleyman Bey b. ( ), Ali b. Ramazan ve gayruhüm.