İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 152 Hüküm no: 105 Orijinal metin no: [25b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Rumeli Kazaskeri Abdürrahimzâde Mehmed Efendi’nin Büyükçekmece’deki çiftlik, bahçe, arsa, eşya ve hayvanlarının Hüseyin Ağa’ya satıldığı Sâbıkan Rumeli kazaskeri iken medîne-i Selânik’de bâ takdîr-i Yezdânî vedâ‘-i âlem-i fânî eden merhûm Abdürrahimzâde Mehmed Efendi’nin necl-i necîbleri mefharü’l-mehâdîmü’l-kirâm Ahmed Efendi tarafından husûs-ı âti’l-beyâna vekîl olduğu, Osman b. Receb ve Yusuf Bey b. Abdullah nâm kimesneler şehâdetleriyle şer‘an sâbit olan Osman Efendi b. Mehmed nâm kimesne meclis-i şer‘-i şerîfde kendi tarafından asîl ve zevcesi fahrü’l-muhadderât Ayşe bt. Abdullah nâm hâtun tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Mahmud Efendi b. Fazlullah ve İbrahim Çelebi b. İsmail nâm kimesneler şehâdetleriyle şer‘an sâbit olan, mefharü’l-emâcid ve’l-ekârim sâhib-i hâze’l-kitâb Hüseyin Ağa b. İsmail mahzarında ikrâr ve takrîr-i kelâm edip müvekkilim mûmâ-ileyh Ahmed Efendi yedinde mülkü olup Havâss-ı Aliyye kazâsı müzâfâtından Büyükçekmece nâhiyesinde tâbi‘-i Perascık nâm karyede vâki‘ Emirpaşa Çiftliği demekle ma‘rûf tahdîd ve tavsîfden müstağnî muhavvateyn muhtevî muhavvata-i hâriciyyesinde iki bâb fevkānî oda ve iki sofa ve bir kenîf ve bir kebîre ahır ve muhavvata-i dâhiliyyesinde dört bâb fevkānî oda ve iki sofa ve câmekânlı bir hamam ve bir matbah ve bir fırın ve üç anbar ve Mehmed Ağa çiftliği ile müşterek mâ-i cârîyi müştemil çiftliği ve karşısında vâki‘ bir köşk ve bir havuz ve bir tahtânî odayı müştemil bahçeyi ve çiftlik-i mezbûra muttasıl bir kıt‘a bağı ve kurbunda vâki‘ etrâf-ı erba‘ası taş duvarlı arsayı, cümle tevâbi‘ ve levâhıkları ve kâffe-i hukūk ve merâfıkları ile ve çiftlik-i mezkûr içinde olan dört çift kara sığır ve bir çift su sığırı öküzü ve dört re’s kara ineği ve üç manda ve bir keçe ve bir kaliçe ve bir tencere ve on iki yastık ve iki sahan ve sekiz yorganı bi safkatin vâhidetin mûmâ-ileyh Hüseyin Ağa’ya bin dört yüz elli esedî guruşa bey‘ ve çiftlik-i mezbûr ile ma‘an tasarruf olunup taht-ı tasarrufunda olan ma‘lûmü’l-hudûd ve ma‘dûdü’l-kıt‘a tarlalar ve çayırları yüz esedî guruş bede[li] mukābelesinde ma‘rifet-i sâhib-i arz ile ferâğ ve tefvîz mûmâ-ileyh Hüseyin Ağa dahi müvekkilesi merkūme Ayşe Hâtun ile beynlerinde müşterek olmak üzre asâleten ve vekâleten iştirâ ve tefevvüz ve kabûl ettiğinden sonra semen-i mezbûr bin dört yüz guruşu ve bedel-i merkūm yüz guruşu cem‘an bin beş yüz elli guruşu müvekkilim mûmâ-ileyh Ahmed Efendi’ye tamâmen edâ ve teslîm ol dahi ahz u kabz edip zikr olunan çiftliği ve bahçeyi ve arsayı ve eşyâ-i mezkûre ve devâbb-ı merkūmeyi ve tarlaları ve çayırları mahallerinde zabt ve tasarrufa mûmâ-ileyh Hüseyin Ağa’yı taslît eyledi dedikde gıbbe’t-tasdîki’ş-şer‘î ve tahkīki’l-mer‘î mâ vaka‘a bi’t-taleb ketb olundu. Fi’l-yevmi’r-râbi‘ mine’s-Saferi’l-hayr li sene seb‘a ve semânîn ve elf. Şuhûdü’l-hâl: Mustafa Efendi b. İbrahim el-İmâm, Abdi b. İslâm, İshak b. Ahmed, Abdi Beşe b. Mustafa, Yusuf b. Abdullah, Mehmed b. Ahmed, Mustafa Beşe b. Abdullah, Abdullah Çelebi b. Ahmed Efendi, Mehmed b. Abdi ve gayruhüm mine’l-hâzırîn.