İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 153 Hüküm no: 106 Orijinal metin no: [25b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zâhide bt. Abdullah’ın ev hissesini kocası Mahmud Çelebi b. Mehmed’e sattığı ve eşyalarını da hibe ettiği Mahmiye-i İstanbul’da Abdi Çelebi mahallesinde sâkine olup zâtını ma‘rifet-i şer‘iyye ile ârifân imâm Mehmed Efendi b. Osman ve müezzin Mehmed Halîfe b. Emrullah nâm kimesneler ta‘rîfleri ile mu‘arrefe olan Zâhide bt. Abdullah nâm hâtun meclis-i şer‘-i hatîr-i lâzımü’t-tevkīrde işbu bâ‘isü’l-kitâb zevci Mahmud Çelebi b. Mehmed nâm kimesne mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrda vâki‘ bir tarafdan balıkçı Mustafa menzili ve bir tarafdan Ahmed Bey menzili ve iki tarafdan tarîk-i âm ile mahdûd olup fevkānî iki bâb oda ve bir sofa ve bir matbah ve tahtânî iki bâb oda ve kenîfi ve bir su kuyusunu ve havluyu müştemil menzilde olan üç sehimden bir sehim hissemi zevcim mezbûr Mahmud Çelebi’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz kıt‘a esedî guruşa bey‘ ve teslîm ol dahi iştirâ ve tesellüm eylediğinden sonra menzil-i mezbûrun semeni olan meblağ-ı mezbûr yüz esedî guruş ile zimmetinde mütekarrir ve ma‘kūdun-aleyh olan altmış guruş mehr-i müeccelimden elli beş guruşunu ve eşyâ-i memlûkemden bir tek cedîd münakkaş yorganımı ve bir tek cedîd çirişkârî yorganı ve iki köhne Yemenî yorganımı ve iki köhne îdî firâşımı ve üç köhne minderimi ve iki köhne yaz keçesi ve dört köhne kumaş yastığı ve dört köhne Yemenî yastığı ve dört köhne kilimi ve dört tenceremi ve üç köhne velensemi ve iki güğümü ve beş sagīr sahanımı ve beş top keten bezi ve bir leğen ve bir ibriği dahi zevcim merkūm Mahmud? Çelebi’ye şurût-ı müfsideden ârî hibe-i sahîha-i şer‘iyye ile hibe ve teslîm ol dahi meclis-i hibede ittihâb ve kabûl ve kabz eylediğinden sonra ba‘de’l-yevm menzil-i mezbûrun semeni olan meblağ-ı mezbûr yüz esedî guruşdan ve mehr-i müeccelim olan meblağ-ı mezbûr altmış guruşun elli beşer guruşundan ve sâlifü’z-zikr eşyâlarda benim kat‘â alâka ve medhalim kalmayıp, meblağayn-i mezkûreyn ile mârrü’z-zikr eşyâlar zevcim mezbûr Mahmud Çelebi’nin mülk-i mevhûbu ve menzil-i mahdûd-ı mezbûrun üç sehimden bir sehmi mülk-i müşterâsı olmuşdur. Keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis min Saferi’l-muzaffer li sene seb‘a ve semânîn ve elf. Şuhûdü’l-hâl: Ahmed Çelebi b. Derviş Yorganî?, İvaz Efendi b. Şaban, Kefeli Mustafa Bey, İbrahim Çelebi b. Mehmed, Abdullah Çelebi b. Ali, Mehmed Çelebi b. Mustafa, Mehmed Çelebi b. Ali, el-Hâc Kemaleddin Kethüdâ-yı Hazret-i Efendi, Hazînedâr el-Hâc Hüseyin ve gayruhüm mine’l-hâzırîn.