İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 154 Hüküm no: 107 Orijinal metin no: [26a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Rumeli kazaskeri Abdürrahimzâde Mehmed Efendi’nin yine vefat eden hanımının bazı menzil, bağ ve çiftlik hisselerinin Mehmed Efendi’ye intikal ettiği << Sâbıkan Rumeli kazaskeri iken medîne-i Selânik’de bâ takdîr-i Yezdânî vedâ‘-i âlem-i fânî eden merhûm Abdürrahimzâde Mehmed Efendi’nin verâseti zevcesi Raziye Hanım bt. el-merhûm Rencber zâde Ahmed Paşa’ya ve sulbî kebîr oğulları mefharü’l-müderrisînü’l-kirâm ve Davud Efendi ve Mehmed Efendi ve Ahmed Efendi’ye ve sulbiye kebîre kızı fahrü’l-muhadderât Hatice Hanım’a münhasıra olup ba‘dehu mezbûre Raziye Hanım vefât edip verâseti sadrî oğulları mûmâ-ileyhim ve Davud Efendi ve Mehmed Efendi ve Ahmed Efendi ve sadriye kızı mûmâ-ileyhâ Hatice Hanım’a münhasıra olup tashîh-i mes’elesi elli altı olup sihâm-ı mezbûreden on altışar sehimi mûmâ-ileyhim ve Davud Efendi ve Mehmed Efendi ve Mehmed Efendi ve Ahmed Efendi’den her birine ve sekiz sehmi mûmâ-ileyhâ Hatice Hâtun’a isâbet eylediği şer‘an sâbit oldukdan sonra mûmâ-ileyh ve Davud Efendi tarafından husûs-ı âti’l-beyâna vekîl olduğu Mehmed Efendi b. Abdülhalim ve el-Hâc Yusuf b. Abdullah nâm kimesneler [şehâdetiyle] şer‘an sâbit olan Osman Efendi b. Mehmed nâm kimesne meclis-i şer‘-i şerîf-i enverde sâhib-i hâze’l-kitâb mûmâ-ileyh Mehmed Efendi mahzarında ikrâr ve takrîr-i kelâm edip merhûm-ı mezbûrun terekesinden olup vilâyet-i Anadolu’da Yoros kazâsına tâbi‘ Kanlıncak nâm kasaba kurbunda vâki‘ tahdîd ve tavsîfden müstağnî büyût-ı adîde ve hamam ve köşkü müştemil yalı ta‘bîr olunur iki kıt‘a menzil ve kurbunda vâki‘ ma‘lûmü’l-hudûd bağdan elli altı sehimden hissesi olan on altı sehm-i şâyi‘ bi cümleti’t-tevâbi‘ ve’l-levâhık bi safkatin vâhidetin altı yüz esedî guruşa müşârün-ileyh Mehmed Efendi’ye bey‘-i kat‘î ile bey‘ ve teslîm ol dahi iştirâ ve tesellüm edip ve mezbûr merhûm-ı mezbûrun ile’l-vefât taht-ı tasarrufunda olup ba‘de vefâtihî intikāl-i âdî ile mûmâ-ileyhim Davud Efendi ve Mehmed Efendi ve Ahmed Efendi’ye intikāl edip zikr olunan yalı kurbunda vâki‘ merkūmü’l-hudûd ma‘dûdü’l-kıt‘a çayır ve tarlalardan üç sehimden mûmâ-ileyh Davud Efendi hissesi olan bir sehim üç yüz guruş bedel mukābelesinde müşârün-ileyh Mehmed Efendi’ye ferâğ ve tefvîz ol dahi tefevvüz ve kabûl eylediğinden sonra semen-i mezbûr altı yüz guruş ve bedel-i merkūm üç yüz guruş, cem‘an dokuz yüz guruşu mûmâ-ileyh ve Davud Efendi zimmetinde müşârün-ileyh Mehmed Efendi’ye mandıradan olan hissesi semeninden dört yüz altmış guruş ve Büyükçekmece’de vâki‘ çiftlikde olan hissesi semeninden üç yüz kırk guruş ve mûmâ-ileyh Ahmed Çelebi’den havâle olunan yüz guruş min haysi’l-mecmû‘ müşârün-ileyh Mehmed Efendi’ye deyni olan dokuz yüz guruşa takās, müşârün-ileyh Mehmed Efendi dahi mukāssa ve kabûl eyledi ba‘de’l-yevm zikr olunan iki kıt‘a menzil ve bağdan elli altışar sehimden mûmâ-ileyh Davud Efendi’nin hissesi olan on altışar sehim müşârün-ileyh Mehmed Efendi’nin mülküdür ve mârrü’z-zikr çayır ve tarlalardan üçer sehimden mûmâ-ileyh Davud Efendi’nin hissesi olan birer sehim müşârün-ileyh Mehmed Efendi’nin hakk-ı müfevvezidir, emsâli gibi mutasarrıf olsun dedikde müşârün-ileyh Mehmed Efendi mukırr-ı merkūm [u] ikrâr-ı meşrûhunda tasdîk ve tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: El-Hâc Kemaleddin Kethüdâ-yı Hazret-i Efendi, el-Hâc Hüseyin hazînedâr, Mustafa Çelebi b. ( ), Musa Çelebi b. ( ), el-Hâc Kasım b. Receb, el-Hâc Mehmed b. ( ) ve gayruhüm >>