İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 155 Hüküm no: 108 Orijinal metin no: [26a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Abdullah’ın kocası Hasan Çavuş b. Sefer’den boşandığı Mahmiye-i İstanbul’da Abdi Subaşı mahallesi sâkinelerinden olup zâtı ma‘rifet-i şer‘iyye ile ârifân Mehmed Çelebi b. Abdullah ve Müezzin Yusuf Halîfe b. Mustafa nâm kimesneler ta‘rîfleri ile mu‘arrefe olan Ayşe bt. Abdullah nâm hâtun meclis-i şer‘-i şerîfde zevc-i dâhili bâ‘is-i hâze’l-kitâb Hasan Çavuş b. Sefer nâm kimesne mahzarında ikrâr ve takrîr-i kelâm edip zevcim mezbûr Hasan Çavuş zimmetinde mütekarrir ve ma‘kūdun-aleyh olan üç yüz esedî guruş mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre zevcim mezbûr Hasan Çavuş ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl kıldıkdan sonra hukūk-ı zevciyyete müte‘allika de‘âvâdan ben mezbûr Hasan Çavuş’un zimmetini ibrâ ve iskāt edip ve mezbûr Hasan Çavuş dahi cihet-i karz-ı şer‘îden zimmetimde hakkı olan yüz dokuz guruşun elli guruşundan mâ‘adâsına ve gayra müte‘allika âmme-i da‘vâdan benim zimmetimi ibrâ ve iskāt eyledi dedikde mezbûr Hasan Çavuş mukırra-i merkūm[e] Ayşe Hâtun’u ikrâr-ı meşrûhunda vicâhen ve şifâhen tasdîk ve tahkīk etmeğin mâ vaka‘a bi’t-taleb ketb olundu. Fi’l-yevmi’s-sâbi‘ min Saferi’l-hayr li sene seb‘a ve semânîn ve elf. Şuhûdü’l-hâl: Mehmed Çavuş b. Hasan, İmâm Mustafa Efendi b. Mehmed, Müezzin Yusuf Halîfe b. Mustafa, Osman Bey b. Mustafa, İdris Çavuş b. ( ), Mehmed Beşe b. Abdullah, el-Hâc İsmail b. Mehmed, Mehmed Çelebi b. Ali.