İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 156 Hüküm no: 109 Orijinal metin no: [26a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müderris İsa Efendi’nin analığı Havvâ’nın Rus asıllı câriyesi Andelib bt. Abdullah’ı azat ettiği Husûs-ı âti’l-beyânın mahallinde tahrîri iltimâs olunmağın savb-ı şer‘-i celîl-i lâzımü’t-tebcîlden Mevlânâ Ömer Efendi b. İsmail irsâl olunup ol dahi umdetü’l-müderrisîn İsâ Efendi b. Ali nâm kimesnenin mahmiye-i İstanbul’da Yenibahçe kurbunda Mimar Sinan Ağa mahallesinde [26b] vâki‘ menziline varıp zeyl-i rakīmde isimleri terkīm olunan udûl-i müslimîn ve sikāt-ı muvahhidîn mahzarlarında akd-i meclis-i şer‘-i mübîn eyledikde müşârün-ileyh İsâ Efendi’nin vâlideliği olup menzil-i mezkûrunda sâkine olan Havvâ bt. Mehmed ve İbrahim Çelebi b. Ahmed nâm kimesneler ta‘rîfleri ile mu‘arrefe oldukdan sonra meclis-i ma‘kūd-ı mezbûrda bi’t-tav‘[i’]s-sâf ikrâr ve i‘tirâf edip bana rıkk-ı sâbıkını mu‘terife olan açık kaşlı, gök ala gözlü, orta boylu Rûsiyyetü’l-asl Andelib bt. Abdullah nâm câriye-i memlûkemi târih-i kitâbdan üç sene mukaddem yedimde mülküm ve hakkım olduğu hâlde hasbeten lillâhi’l-hallâk tahrîr ve i‘tâk ve zümre-i harâir-i asliyyâta ilhâk eylemiş idim. Mevsûfe-i mezbûre Andelib târih-i mezkûrdan beri sâir harâir-i asliyyât gibi hürre olup hakk-ı velâ-i şer‘îden mâ‘adâ üzerinde hak ve alâkam kalmamışdır dedikde husûs-ı mezkûru Mevlânâ-yı mezbûr mahallinde tahrîr ba‘dehu ma‘an irsâl olunan Hasan Çelebi b. Bayram ve Yusuf b. Abdullah ile meclis-i şer‘a gelip alâ vukū‘ihi inhâ ve takrîr eyledikde mâ hüve’l-vâki‘ bi’l-ibtigā ketb olundu. Fi’l-yevmi’t-tâsi‘ min Saferi’l-hayr li sene seb‘a ve semânîn ve elf. Şuhûdü’l-hâl: El-Hâc Abdi Ağa b. Ali, es-Seyyid Hüseyin Çelebi b. Ali, Mehmed Efendi b. Abdurrahman, Sirkeci el-Hâc Mehmed b. Hüseyin, Ahmed Çelebi b. el-Hâc Abdi Ağa, İbrahim Çelebi b. el-Hâc Abdi, Molla Ahmed Efendi b. Receb, Kenan Bey b. Abdüssettar.