İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 158 Hüküm no: 111 Orijinal metin no: [26b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman Ağa’nın Akşehir’in Karaöyük köyündeki zeâmet gelirini toplayanlarla olan anlaşmazlığı ve durumun teftişine karar verildiği Min hattıhî Vilâyet-i Anadolu’da kasaba-i Akşehir müzâfâtından Karaöyük nâm karye ve gayriden otuz bin akçe ze‘âmete mutasarrıf olan fahrü’l-akrân Süleyman Ağa b. Hamza meclis-i şer‘-i şerîfde Mustafa Beşe b. Ahmed ve Süleyman Bey b. Ebûbekir nâm kimesneler mahzarlarında üzerlerine da‘vâ ve takrîr-i kelâm edip ze‘âmet-i mezbûrenin bin seksen beş ve seksen altı senelerinde hâsıla olacak mahsûlâtını mezbûrân Mustafa Beşe ve Süleyman Bey’e der-uhde edip anlar dahi ale’l-iştirâki’s-seviy iltizâm ve kabûl ve seneteyn-i mezbûreteynde ze‘âmet-i mezbûrenin mahsûlâtını re‘âyâsından cem‘ ve tahsîl ettiklerinden sonra ber vech-i muharrer der-uhde ettikleri meblağ-ı mezbûrun iki yüz [27a] on guruşunu mezbûr Mustafa Beşe ve yüz guruşunu mezbûr Süleyman Bey bana def‘ ve teslîm ben dahi ahz u kabz edip iki yüz doksan guruşu bâkī kalmağla hâlâ mezbûrân Mustafa Beşe ve Süleyman Bey’e suâl olunup meblağ-ı bâkī-i mezbûrun alıverilmesi matlûbumdur dedikde gıbbe’s-suâl mezbûrân Mustafa Beşe ve Süleyman Bey cevâblarında, ze‘âmet-i mezbûreyi ber vech-i muharrer der-uhde ve iltizâm edip seneteyn-i mezbûreteynde ze‘âmet-i mezbûre mahsûlâtından ancak üç yüz altmış guruş makbûzumuz olmağla meblağ-ı mezbûrdan müdde‘î-i mezbûra üç yüz yirmi guruş teslîm edip mâ‘adâsı olan kırk guruşu dahi müdde‘î-i mezbûrun emri ile at ve hizmetkârına sarf etmiş idik deyip ziyâde makbûzları olduğunu inkâr etmeğin müdde‘î-i mezbûrdan müdde‘âsını mübeyyine beyyine taleb olundukda ityân-ı beyyine için istimhâl etmekle mahallinde teftîşine havâle olundukdan sonra mezbûr Süleyman Bey müdde‘î-i mezbûr ile kasaba-i mezbûreye varıp seneteyn-i mezbûreteynden ze‘âmet-i mezbûrenin mahsûlâtını teftîş ve müdde‘î-i mezbûr ile husûmet ve redd-i cevâba tarafından vekâlet-i devriyye ile mezbûr Mustafa Beşe’yi vekîl ve nâib-i menâb nasb ve ta‘yîn eyledikde ol dahi vekâlet-i mezbûreyi kabûl etmeğin mâ vaka‘a bi’t-taleb ketb olundu. Fi’l-hâdî aşer min Saferi’l-hayr li sene seb‘a ve semânîn ve elf. Şuhûdü’l-hâl: Kemaleddin Ağa kethüdâ, Hüseyin Ağa b. Üveys, İbrahim Çelebi b. Mehmed, el-Hâc Kadri b. Durmuş el-Mübâşir, Ebûbekir b. Hüseyin, Osman Çelebi b. Ömer, Ali Beşe b. Hüseyin el-Mübâşir, el-Hâc Kasım b. Receb.