İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 162 Hüküm no: 117 Orijinal metin no: [28a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cafer Çelebi’nin mecnun olan amca oğlu Mustafa b. Abdullah’a vasî tayin edildiği Mahmiye-i İstanbul’da el-Hâc Muhyiddin mahallesi ahâlîsinden Derviş b. Ramazan ve Mustafa b. Bâli ve Hüseyin Beşe b. Hasan ve Ömer Efendi b. Abdullah ve Ali Çelebi b. Abdullah ve Ali Çelebi b. Mehmed nâm kimesneler meclis-i şer‘-i şerîfde mahalle-i mezbûre ahâlîsinden olup işbu hâzır bi’l-meclis Mustafa b. Abdullah nâm kimesne cünûn-ı mutbık ile mecnûn olduğunu ihbâ[r] etmeleriyle mezbûr Mustafa’nın ahvâlini zabt ve emvâlini hıfz için taraf-ı şer‘den bir vasî nasb ve ta‘yîn olunmak ehem ve elzem ve ammi oğlu bâ‘is-i hâze’l-kitâb Cafer Çelebi b. Abdullah müstakīm ve her vechile vesâyet uhdesinden gelmeğe kemâ yenbağī kādir olmağın mecnûn-ı mezbûrun ahvâlini zabt ve emvâlini hıfz için taraf-ı şer‘den mezbûr Cafer Çelebi vasî nasb ve ta‘yîn olunup ol dahi vesâyet-i mezbûreyi kabûl ve hizmet-i lâzımesin edâya ta‘ahhüd ve iltizâm etmeğin mâ vaka‘a bi’t-taleb ketb olundu. Fi’l-yevmi’s-sâmin min Saferi’l-hayr li sene seb‘a ve semânîn ve elf. Şuhûdü’l-hâl: İbrahim Çelebi b. Mehmed kethüdâ-yı muhzır, Osman Çelebi b. ( ) el-Muhzırân, Hasan Çelebi b. ( ) el-Muhzırân, Mehmed b. Mehmed ve gayruhüm mine’l-hâzırîn.