İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 165 Hüküm no: 120 Orijinal metin no: [29a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Mustafa’nın kocası Ali Beşe b. İsmail’den muhâla‘a yoluyla boşandığı Mahmiye-i İstanbul’da Merkez Efendi mahallesinde sâkinelerinden olup zâtı ma‘rifet-i şer‘iyye ile ârifân mahalle-i mezbûre sükkânından İbrahim b. Osman İlyas ve Eyyûb b. Hüseyin nâm kimesneler ta‘rîfleri ile mu‘arrefe olan Ayşe bt. Mustafa nâm hâtun meclis-i şer‘-i şerîfde zevc-i dâhili bâ‘is-i hâze’l-kitâb Ali Beşe b. İsmail nâm kimesne mahzarında ikrâr ve takrîr-i kelâm edip zevcim mezbûr Ali Beşe zimmetinde mütekarrir ve ma‘kūdun-aleyh bin beş yüz mehr-i müeccelim ve nafaka-i iddet-i ma‘lûmem üzerlerine mezbûr Ali Beşe yedine teslîm eylediğim bir Yemenî yorgan ve bir beledî yastık ve sekiz makrama ve üç don ve üç gömlek kendinin olup me’ûnet-i süknâm dahi kendi üzerime olmak üzre, zevcim mezbûr Ali Beşe ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl ettiğinden sonra hukūk-ı zevciyyete ve gayra müte‘allika âmme-i da‘vâdan her birimiz âharın zimmetini ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis min Saferi’l-hayr li sene seb‘a ve semânîn ve elf. Şuhûdü’l-hâl: İbrahim b. Hüseyin, Mehmed b. Musa, İbrahim b. İlyas, Eyyûb b. Hüseyin, Ali b. Durmuş, Hüseyin b. Abdullah, İbrahim b. Mehmed ve gayruhüm mine’l-hâzırîn.