İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 166 Hüküm no: 121 Orijinal metin no: [29a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çatalca’dan Hasan Beşe b. Ali’nin kaybolan beygirinin Osman Beşe b. Mehmed’de olduğu ve iadesi Havâss-ı Aliyye kazâsına tâbi‘ Çatalca kasabası ahâlîsinden bâ‘is-i hâze’l-kitâb Hasan Beşe b. Ali nâm kimesne meclis-i şer‘-i şerîf-i hatîr-i lâzımü’t-tevkīrde Osman Beşe b. Mehmed nâm kimesne mahzarında üzerine da‘vâ ve takrîr-i kelâm edip târih-i kitâbdan üç gün mukaddem kasaba-i Silivri’de mülküm olan işbu kır bârgiri üzerinde olan eğeriyle zâyi‘ olmuş idi hâlâ mezbûr Osman Beşe yedinde bulunmağla suâl olunup zikr olunan bârgiri ve eğeri bana teslîme tenbîh olunmak matlûbumdur dedikde gıbbe’s-suâl mezbûr Osman Beşe cevâbında zikr olunan bârgiri eğeri ile târih-i kitâbdan iki [gün] mukaddem Büyükçekmece[’de] ismi ma‘lûmum olmayan bir kimesneden altı buçuk guruşa iştirâ ve kabz etmiş idim deyip müdde‘î-i mezbûrun mülkü olduğu ma‘lûmum değildir deyicek müdde‘î-i mezbûr Hasan Beşe’den müdde‘âsını mübeyyine beyyine taleb olundukda kasaba-i Kasımpaşa’da Seferikoz mahallesi sükkânından Ali Beşe b. Mustafa ve mahmiye-i İstanbul’da Mehmed Ağa mahallesi sükkânından el-Hâc Yusuf b. Himmet nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka sâlifü’z-zikr bârgir ve üzerinde olan eğer müdde‘î-i mezbûr Hasan Beşe’nin târih-i kitâbdan üç gün mukaddem yedinde mülkü idi, biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olup müdde‘î-i mezbûr tahlîf-i şer‘î ile tahlîf olundukdan sonra mûcebince sâlifü’z-zikr bârgiri ve üzerinde olan eğeri müdde‘î-i mezbû[r] Hasan Beşe’ye teslîme mezbûr Osman Beşe’ye tenbîh birle, mâ vaka‘a bi’t-taleb ketb olundu. Fi’l-yevmi’s-sâbi‘ min Saferi’l-hayr li sene seb‘a ve semânîn ve elf min hicreti men lehü’l-izzi ve kemâlü’ş-şeref. Şuhûdü’l-hâl: İbrahim Çelebi b. Mehmed, Osman Çelebi b. ( ), Kara Mustafa b. Şaban, Veli Beşe b. Mahmud, Hüseyin Beşe b. Mehmed ve gayruhüm mine’l-hâzırîn.