İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 167 Hüküm no: 123 Orijinal metin no: [29b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gevher bt. Abdullah’ın vasiyeti kaydı Mahmiye-i İstanbul’da Molla Ahaveyn mahallesi sâkinelerinden Gevher bt. Abdullah nâm hâtun tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân mahalle-i mezbûre müezzini Mustafa Çelebi b. Ahmed ve İmâm Ahmed Efendi b. Ali nâm kimesneler şehâdetleriyle şer‘an sâbit olan İbrahim Çelebi b. Mehmed nâm kimesne meclis-i şer‘-i şerîfde bâ‘is-i hâze’l-kitâb el-Hâc Yusuf b. Âbidin nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Gevher Hâtun bi emrillâhi te‘alâ dâr-ı fenâdan dâr-ı bekāya intikāl ve irtihāl ettiğimde cemî‘ malımın sülüsü techîz ve tekfîn ve sâir levâzımı defn ve iskāt-ı salâtıma ve fazla kalırsa vücûh-ı hayrâta harc ve sarf olunduğundan sonra sülüsânı dahi mezbûr el-Hâc Yusuf’a verile deyû târih-i kitâbdan altı ay mukaddem vasiyyet edip tenfîzine mezbûr el-Hâc Yusuf’u vasiyy-i muhtâr nasb ve ihtiyâr edip mezbûr el-Hâc Yusuf dahi vesâyet-i mezbûreyi kabû[l] ve merâsimini edâya ta‘ahhüd etmiş idi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ min Saferi’l-hayr li sene seb‘a ve semânîn ve elf. Şuhûdü’l-hâl: Ahmed Efendi b. Yahya el-İmâm, Mustafa Efendi b. Ahmed el-Müezzin, Hasan Çelebi b. Ebûbekir, Osman Beşe b. Mahmud, Ali Çelebi b. Abdullah, Yusuf Beşe b. Abdullah, Bâkī Çelebi b. Abdullah.