İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 167 Hüküm no: 124 Orijinal metin no: [29b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Havvâ bt. Mustafa’nın el-Hâc Veli b. Nasûh’tan muhâla‘a yoluyla boşandığı Mahmiye-i İstanbul’da Kazasker Mehmed Efendi mahallesinde sâkine olup zâtı ma‘rifet-i şer‘iyye ile ârifân Halil Çelebi b. Abdullah ve Yasin Beşe b. Ali nâm kimesneler ta‘rîfleriyle mu‘arrefe olan Havvâ bt. Mustafa nâm hâtun meclis-i şer‘-i şerîfde zevc-i dâhili işbu bâ‘isü’l-vesîka el-Hâc Veli b. Nasûh nâm kimesne mahzarında ikrâr ve takrîr-i kelâm edip zevci mezbûr el-Hâc Veli zimmetinde mütekarrir ve ma‘kūdun-aleyh olan üç bin akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olup ve mahalle-i mezbûrede vâki‘ menzilim ücretinden zimmetinde hakkım olan altı yüz akçe ve yedimden müşterâ ve makbûz kapama bahâsından dahi kezâlik zimmetinde hakkım olan yüz kırk akçe dahi bedel-i hul‘ olmak üzre mezbûr el-Hâc Veli ile muhâla‘a edip ol dahi muhâla‘a-i mezbûreyi kabûl eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis aşer min Saferi’l-hayr li sene seb‘a ve semânîn ve elf. Şuhûdü’l-hâl: Umdetü’l-meşâyihi’l-kirâm Şükûri Efendi, Mehmed Efendi el-kâtib, Halil b. Abdullah, Hasan Beşe b. Ali, İbrahim b. Ahmed, Mehmed b. Ahmed el-Müezzin.