İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 168 Hüküm no: 125 Orijinal metin no: [29b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zâhide bt. Abdullah’ın vasiyeti kaydı Mahmiye-i İstanbul’da Abdi Çelebi mahallesinde sâkine olup zâtını ma‘rifet-i şer‘iyye ile ârifân İmâm Mehmed Efendi b. Osman ve Müezzin Mehmed Halîfe b. Emrullah nâm kimesnelerin ta‘rîfleri ile mu‘arrefe olan Zâhide bt. Abdullah nâm hâtun meclis-i şer‘-i hatîr-i lâzımü’t-tevkīrde işbu bâ‘isü’l-kitâb Mustafa Beşe b. Abdullah nâm kimesne mahzarında takrîr-i kelâm ve ta‘bîr-i merâm edip işbu hâzır bi’l-meclis zevcim Mahmud Çelebi zimmetinde mütekarrir ve ma‘kūdun-aleyh mehr-i müeccelim olan altmış esedî guruşdan bâkī kalan beş guruş ve cihet-i karz-ı şer‘îden yüz kıt‘a esedî guruş ile cem‘an yüz beş kıt‘a esedî guruş zevcim mezbûr Mahmud Çelebi zimmetinde hakkım olmağla ben bi emrillâhi te‘alâ dâr-ı bekāya intikāl ve rıhlet eylediğimde meblağ-ı mezbûr yüz beş kıt‘a esedî guruşun yetmiş beş guruşunu hîn-i vefâtımda techîz ve tekfîne ve eyyâm-ı mu‘tâdda tabh-ı ta‘âm için harc ve sarf oluna ve yirmi beş guruşu dahi külle yevm üçer İhlâs-ı şerîf kırâ’at edip sevâbını rûhuma ihdâ etmek üzre mahalle-i mezbûrede imâm olan Mehmed Efendi’ye hayâtda oldukça verile ve beş guruşu dahi üç hatm-i şerîf tilâvet edip kezâlik sevâbını rûhuma ihdâ etmek üzre mahalle-i mezbûre müezzini olan Mehmed Halîfe’ye verile deyû ber vech-i muharrer ettiğim vasiyyetimin tenfîzine mezbûr Mustafa Beşe’yi vasiyy-i muhtâr nasb ve ihtiyâr eylediğimde, mezbûr Mustafa Beşe dahi kabûl ve merâsimini edâya ta‘ahhüd eyledi [30a] dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ min Saferi’l-muzaffer li sene seb‘a ve semânîn ve elf. Şuhûdü’l-hâl: Ahmed Çelebi b. Derviş Kadırgalı? Ali, İvaz Efendi b. Şaban, Kefeli Mustafa Bey, İbrahim Çelebi b. Mehmed, Abdülkerim Çelebi b. Ali, Mehmed Çelebi b. Nasûh, Mehmed Çelebi b. Ali, el-Hâc Kemaleddin Kethüdâ-yı Hazret-i Efendi, Hazînedâr el-Hâc Hüseyin ve gayruhüm.