İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 245 Hüküm no: 211 Orijinal metin no: [53a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nazike bt. Abdullah’ın kocasına ait evi Âbide bt. Mehmed’e sattığı Mahmiye-i İstanbul’da Yenibahçe kurbunda Karabaş mahallesi sâkinelerinden Nazike bt. Abdullah nâm hâtunun zevci ve tarafından menzil-i âti’l-beyânı bey‘a ve kabz-ı semene vekîl olduğu mezbûrenin zâtını ma‘rifet-i şer‘iyye ile ârifân mahalle-i mezbûre sükkânından Yahya Çelebi b. Receb ve Hasan Çelebi b. Hüseyin nâm kimesneler şehâdetleri ile şer‘an sâbit olan Muharrem Beşe b. Sefer nâm kimesne meclis-i şer‘-i hatîr-i lâzımü’t-tevkīrde mahalle-i mezbûrda sâkine bâ‘isetü hâze’l-kitâb Âbide bt. Mehmed Efendi nâm hâtun tarafından husûs-ı âti’l-beyâna vekîl olduğu mezbûre Âbide Hâtun’un zâtını ma‘rifet-i şer‘iyye ile ârifân Mustafa Beşe b. Mustafa ve çukadâr el-Hâc İsâ b. İlyas nâm kimesneler şehâdetleri ile şer‘an sâbit olan Ahmed Çelebi b. Abdülbâkī nâm kimesne mahzarında bi’l-vekâle ikrâr-ı tâm ve takrîr-i kelâm edip akd-i âti’z-zikrin sudûruna değin zevcem müvekkile-i mezbûre Nazike Hâtun’un yedinde mülk ve hakkı olup mahalle-i mezbûrede vâki‘ bir tarafdan sarrâc Mehmed Çelebi menzili ve bir tarafdan Ahmed Ağa menzili ve bir tarafdan hâfız Ahmed Paşa vakfı olan menzil ve bir tarafdan tarîk-i âm ile mahdûd olup fevkānî bir bâb oda ve bir sofa ve tahtânî bir bâb oda ve bir matbah ve kenîfi ve cüneyne yerini müştemil olan mülk menzili, bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık dört yüz yirmi beş kıt‘a esedî guruşa tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile vekîl-i mezbûr Ahmed Çelebi’ye bey‘ ve teslîm ol dahi müvekkilesi mezbûre Âbide Hâtun için iştirâ ve tesellüm ve kabz eylediğinden sonra menzil-i mezbûrun semeni olan meblağ-ı mezbûr dört yüz yirmi beş esedî guruşu vekîl-i mezbûr Ahmed Çelebi yedinden bi’t-tamâm ve’l-kemâl ahz u kabz edip ba‘de’l-yevm menzil-i mahdûd-ı merkūmda zevcem müvekkile-i mezbûrenin alâka ve medhali kalmayıp, müvekkile-i mezbûre Âbide Hâtun’un mülk-i müşterâsı ve hakk-ı sırfı olmuşdur, keyfe mâ yeşâ’ ve tahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: İmâm Hasan Efendi b. Mustafa, el-Hâc Mehmed b. el-Hâc Ahmed, Mehmed Çelebi b. İbrahim, Mehmed b. Ahmed el-münâdî, Muslu Çelebi b. Hüseyin, Sâlih Efendi b. Sinan, Ali Abdullah Çelebi el-Müezzin, Ahmed Bey b. Sinan, Sadık Beşe b. Mehmed.