İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 246 Hüküm no: 212 Orijinal metin no: [53a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Hamza’nın vârislerine ait olan evin Sâlih Efendi b. İbrahim’e satıldığı Mahmiye-i İstanbul’da Cebecibaşı mahallesi sükkânından iken bundan akdem vefât eden el-Hâc Hamza b. ( ) nâm kimesnenin verâseti sulbiye kebîre kızları Ümmühâni ve Ayşe nâm hâtunlara münhasıra olup ba‘dehu mezbûre Ayşe dahi vefât edip verâseti zevc-i metrûkü Halil Efendi ile sulbî oğlu Mehmed’e münhasıra ve tashîh-i mes’eleleri bi târîki’l-münâsahati’ş-şer‘iyye sekiz sehimden olup sihâm[-ı erba‘ası] mezbûre Ümmühâni Hâtun’a ve bir sehmi merkūm Halil Efendi’ye ve üç sehmi dahi sagīr-i mezbûr Mehmed’e isâbet ettiği şer‘an zâhir ve mütehakkik oldukdan sonra mezbûr Halil Efendi kendi tarafından asâleten ve oğlu sagīr-i mezbûr Mehmed tarafından velâyeten ve mezbûre Ümmühâni tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân mahmiye-i mezbûrede Derviş Ali mahallesi sâkinlerinden Süleyman b. Ali ve Hasan Halîfe b. Habib nâm kimesneler şehâdetleri ile şer‘an sâbit olmağla vekâleten meclis-i şer‘-i şerîfde bâ‘is-i hâze’l-kitâb Sâlih Efendi b. İbrahim nâm kimesne mahzarında ikrâr ve takrîr-i kelâm edip nısf-ı şâyi‘ müteveffâ-yı mezbûre Ayşe’nin ve nısf-ı şâyi‘-i âharı müteveffâ-yı mezbûr el-Hâc Hamza’nın mülkü olup mahmiye-i merkūmede Kâtib Mustafa Çelebi mahallesinde vâki‘ bir tarafdan Sâlih Efendi mülkü ve bir tarafdan Siyavuş Paşa odaları ve bir tarafdan Mimar Ağa vakfı olan menzil ve bir tarafdan Ayşe Hâtun mülkü ve ba‘zan tarîk-i hâs ile mahdûd fevkānî iki bâb oda ve bir sofa ve bir su kuyusu ve bir kenîf ve mahzeni müştemil mülk menzilden mezbûrun hissesi olan nısf-ı şâyi‘-i mezbûru ba‘de vefâtihî bi tarîki’l-münâsahati’l-mezbûre bana ve oğlum sagīr-i [mezbûr Mehmed’e ve] mezbûre Ümmühâni’ye isâbet eyleyen cem‘an sekiz sehm-i şâyi‘i mezbûr Sâlih Efendi’ye tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile on bin akçeye bi safkatin vâhide bi’l-a[sâ]le ve bi’l-[ve]lâye ve bi’l-vekâle bey‘ ve teslîm ol dahi ber vech-i muharrer iştirâ ve tesellüm ettiğinden sonra menzil-i mahdûd-ı mezkûrdan müteveffât-ı mezbûre Ayşe’nin ber vech-i muharrer mülkü olan şâyi‘-i âharı dahi ba‘de vefâtihâ bi’l-irsi’ş-şer‘î bana ve oğlum sagīr-i mezbûra intikāl etmekle zikr olunan nısf-ı şâyi‘-i âhar dahi kezâlik tarafeynden îcâb ve kabûlü [53b] hâvî bey‘-i kat‘î ile on bin akçeye bi’l-asâle ve bi’l-velâye mezbûr Sâlih Efendi’ye bey‘ ve teslîm ol dahi ber vech-i muharrer iştirâ ve tesellüm ettiğinden sonra semeneyn-i mezkûreyn cem‘an yirmi bin akçeyi asâleten ve velâyeten ve vekâleten mezbûr [Sâlih Efendi yedinden bi’t-tamâm ahz u kabz eyledim ba‘de’l-yevm menzil-i mahdûd-ı mezbûr] Sâlih Efendi’nin mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: Ömer Efendi b. İsâ, Mehmed b. Abdullah, İbrahim b. Ali, İbrahim Çelebi b. Ahmed, Mustafa b. ( ), Veli Beşe b. Mahmud, Osman b. Ömer, Durmuş b. Veli, Mehmed Efendi el-Müezzin ve gayruhüm.