İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 247 Hüküm no: 213 Orijinal metin no: [53b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Debbâğ Yunus mahallesinden Terzi Hüseyin b. Ali’nin evini Mustafa Çelebi b. Ali’ye sattığı Mahmiye-i İstanbul’da Debbâğ Yunus mahallesinde sâkin terzi üstâd Hüseyin b. Ali nâm kimesne meclis-i şer‘-i şerîfde bâ‘is-i hâze’l-kitâb Mustafa Çelebi b. Ali nâm kimesne mahzarında ikrâr ve takrîr-i kelâm edip akd-i âtî sudûruna değin yedimde mülk ve hakkım olup mahalle-i mezbûrede vâki‘ bir tarafdan Medîne-i Münevvere vakfı ve bir tarafdan mahalle-i mezbûre imâmına meşrût vakıf menzil ve bir tarafdan Mehmed Ağa nâm kimesne mülkü ve bir tarafdan tarîk-i âm ile mahdûd tabaka-i ulyâsında bir bâb oda ve bir sofa ve dehliz ve tabaka-i vustâsında bir bâb oda ve dehliz ve kenîf ve tabaka-i süflîsinde bir bâb oda ve mahtab ve bir kenîfi müştemil olan menzilimin nısf-ı şâyi‘ini, mezbûr Mustafa Çelebi’ye tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile nakd-i râyic fi’l-vakt sekiz bin iki yüz elli akçeye bey‘ ve teslîm edip ol dahi ber vech-i muharrer iştirâ ve kabûl ve tesellüm eyledikden sonra semeni olan meblağ-ı mezbûr sekiz bin iki yüz elli akçeyi mezbûr Mustafa Çelebi yedinden tamâmen ahz u kabz eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: Abdullah Efendi b. Mehmed el-İmâm, İbrahim Efendi b. Abdülmennân el-Müezzin, Vişnezâde çukadârı Ali Beşe b. Osman, Zeynel Efendi b. Himmet, Osman b. Ömer, sekban Mehmed Ağa b. ( ), V… Çelebi b. ( ), Pazarcı Kara Mehmed, el-Hâc Hamza b. ( ), Tüfenkçi Ali Beşe b. ( ), Tüfenkçi Mahmud Çelebi b. ( ).