İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 248 Hüküm no: 214 Orijinal metin no: [53b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pelik v. David’in tarlasının yarı hissesini Kirkor v. Barik’e devrettiği Vilâyet-i Anadolu’da Divriği kazâsına tâbi‘ Kesme nâm karye ahâlîsinden olup mahmiye-i İstanbul’da Manisalı Çelebi mahallesinde sâkin Pelik v. David nâm Ermeni kendi tarafından asâleten ve li ebeveyn karındaşı Andon tarafından husûs-ı âti’l-beyâna vekîl olduğu karye-i mezbûre ahâlîsinden Pelik v. Mıgırdiç ve Avanos v. Beyler nâm Ermeniler şehâdetleri ile sâbit olmağla vekâleten meclis-i şer‘-i şerîfde bâ‘is-i hâze’s-sifr Krikor v. Barik? nâm Ermeni muvâcehesinde ikrâr ve takrîr-i kelâm edip tefvîz-i âti’z-zikrin sudûruna değin müvekkil-i mezbûr ile ale’l-iştirâki’s-seviy taht-ı tasarrufumda olup karye-i mezbûre kurbunda vâki‘ bir tarafdan Şeyhî oğlu tarlası ve bir tarafdan Sadık oğlu tarlasına ve bir tarafdan bâyi‘-i âhar tarlasına ve bir tarafdan tarîk-i âm ile mahdûd tarlamızın nısf-ı şâyi‘ini, mezbûr Kirkor’a ma‘rifet-i sâhib [-i arz] ile otuz esedî guruş bedel mukābelesinde asâleten ve vekâleten ferâğ ve tefvîz ol dahi tefevvüz ve kabûl eyledikden sonra bedeli olan meblağ-ı mezbûr otuz esedî guruşu mezbûr Krikor yedinden tamâmen ahz u kabz eyledim ba‘de’l-yevm sâlifü’z-zikr tarlanın nısf-ı şâyi‘i mezbûr Krikor’un hakk-ı müfevvezidir, keyfe mâ yeşâ’ ve yahtâr mutasarrıf olsun dedikde mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: Avanos v. Beyler, Toros v. Eksodos, Pelik v. Mıgırdiç, Krikor v. Barik, Kahan v. Asvadur, Markos v. Haçik, Ares? v. Kelori, Kahan v. Asvadur, Hasan Beşe b. Abdullah.