İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 248 Hüküm no: 215 Orijinal metin no: [53b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Hasan’ın, tarlasının kullanım hakkını Mehmed b. Ayvaz’a devrettiği Vilâyet-i Anadolu’da Kangırı sancağında Kurşunlu kazâsına tâbi‘ Karacalar nâm karye ahâlîsinden olup mahmiye-i İstanbul’da Acem Oğlanı odasında sâkin olan Mehmed b. Hasan nâm kimesne meclis-i şer‘-i şerîfde karye-i mezbûre sükkânından diğer Mehmed b. Ayvaz taht-ı tasarrufumda olup karye-i mezbûrede vâki‘ bir tarafdan el-Hâc Süleyman tarlası ve bir tarafdan Nebi Sofu tarlası ve bir tarafdan Süleyman oğlu tarlası ve bir tarafdan İsmail oğlu tarlası ile mahdûd olan tahmînen sekiz kile istî‘âb eden tarlamı, sâhib-i arz ma‘rifetiyle mezbûr diğer Mehmed’e on guruş bedel mukābelesinde ferâğ ve tefvîz ol dahi tefevvüz ve kabûl ettiğinden sonra bedel-i ferâğ olan meblağ-ı mezbûr on esedî guruşu diğer Mehmed yedinden [54a] tamâmen ahz u kabz eyledim ba‘de’l-yevm mârrü’z-zikr olan tarla mezbûr diğer Mehmed’in hakk-ı müfevvezidir emsâli gibi mutasarrıf olsun dedikde gıbbe’t-tasdîki’ş-şer‘î ve’t-tahkīki’l-mer‘î mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: Mehmed Ağa muhzırbaşı hâlâ, Mehmed Ağa kethüdâ-yı muhzırân, İbrahim Çelebi b. Mehmed, Ali b. Veli ve gayruhüm.